गठबन्धनयात निरन्तरता बीगु सहमति
येँ – सत्तारुढ नेकपा (माओवादी) व एकीकृत समाजवादी पार्टी गठबन्धन ल्यंकेत व अमेरिकी सहयोग परियोजना मिलेनियम च्यालेन्ज कर्पोरेशन (एमसीसी) सम्झौता अनुमोदन यायेत तयार जूगु खँ सीदुगु दु ।
एमसीसीया कारणं गठबन्धन त्वाःदलिगु स्थिति वयेवं निगुलिं दलं विपक्षय् मतदान यायेगु अडानं लिचिउगु खः । आः निगुलिं दलं एमसीसी अनुमोदनया निंतिं निर्णयार्थ पेश याइगु लकस दयेकेत संसद बहिष्कार याइगु जूगु दु । उकिया जानकारी माओवादी केन्द्रया अध्यक्ष पुष्पकमल दाहालं म्हिगः प्रधानमन्त्री शेरबहादुर देउवायात नापलानाः बीधुंकूगु दु ।
म्हिगः माओवादीया मन्त्रीतय्सं एमसीसी नं अनुमोदन जुइगु व गठबन्धन नं त्वाःमदलीगु लँपु मालेत स्थायी कमिटीया बैठकय् सुझाव बिउगु खःसा सुझावकथं अध्यक्ष दाहाल व अर्थमन्त्री जनार्दन शर्मा बालुवाटारय् वनाः प्रधानमन्त्री देउवालिसे सहलह यानादीगु खः । सहलहय् नेपाली कांग्रेसपाखें प्रधानमन्त्री देउवा, महामन्त्री गगन थापा, पूर्णबहादुर खड्का व सरकारया प्रवक्ता लिसे सञ्चारमन्त्री ज्ञानेन्द्रबहादुर कार्कीं ब्वति कयादीगु खः ।
वंगु बिहीवाः जक प्रधानमन्त्री देउवां गठबन्धन न्ह्यःने मन्ह्याइगु खँ धयादीगु खःसा म्हिगःया बैठक लिपा निगुलिं पुचलं सहलह सकारात्मक जूगु धासें गठबन्धनयात निरन्तरता बीगु निर्णय याःगु खः । आः कन्हय् च्वनीगु प्रतिनिधिसभाया बैठकय् माओवादी केन्द्र, नेकपा एसं बैठक बहिष्कार याइगु ज्याझ्वः दुसा एमालें बेल घेराउ यायेगु ज्याझ्वःयात निरन्तरता बियाः एमसीसी सम्झौता पारित यायेगु निंतिं लँपु चायेका बीगु जूगु दु ।
बेल घेराउ व बहिष्कारया दथुइ कांग्रेसं ध्वनी मतया आधारय् सम्झौता पारित याइगु जूगु दु । मतदानया झ्वलय् संघीय समाजवादी पार्टी व लोकतान्त्रिक समाजवादी पार्टीं धाःसा एमसीसीया पक्षय् मतदान याइगु जूगु दु ।
LEAVE YOUR COMMENTS