स्वनिगःया स्थानीय तह उपप्रमुखतय् संजाल
येँ(नेपालभाषा टाइम्स)- स्वनिगःया स्थानीय तहया उपप्रमुखतय् संजाल गठन याःगु दु । स्वनिगःया दक्वं स्थानीय तहया उपप्रमुखतय् मुँज्यां येँ महानगरपालिकाया उपप्रमुख सुनिता डंगोलया संयोजकत्वय् ‘काठमाडौं उपत्यका उपप्रमुख संजाल’ गठन याःगु खः ।
कानुनं उपप्रमुख/उपाध्यक्षयात बियातःगु अधिकार बारे समान बुझाइ निर्माण यायेगु, कार्यगत प्रणालीइ एकरुपता हयेगु, साझा सवालय् सहकार्य व समन्वय यायेगु, चुनौतियात साझा संयन्त्रपाखें समाधान यानाः असल अभ्यास व सिकाइ कालबिल यायेगु संजालया उद्देश्य जूगु खँ धाःगु दु ।
संजालया संयोजक येँ महानगर उपप्रमुख डंगोलं संजालं मंकाः कुतलय् क्षमता विकास, कानूनी व संस्थागत विकासया प्रबन्धय् सहकार्य यायेगु खँ धयादीगु दु । येँ महानगरया कार्यवाहक प्रमुखतकं जुयाच्वनादीम्ह वय्कलं मंकाः समस्यायात मंकाः कुतःपाखें हे समाधान यायेत संजालया तःधंगु भूमिका दइगु विश्वास बैठकय् प्वंकादीगु दु ।
वय्कलं नगरपालिकां उपप्रमुखया कार्य क्षेत्रलिसे सम्बन्धित विषयय् क्षमता विकास, थवंथवय् सीप व हितय् सहकार्य व आदानप्रदान यानाः प्रत्येक पालिकां योजना व ज्याझ्वः तर्जुमा यायेमाःगु खँय् बः बियादीगु दु ।
बैठकं हरेक महिनाय् बैठक च्वनेगु निर्णय नं याःगु दुसा थ्व ल्याखं मेगु बैठक वइगु २०८० बैशाख १५ गते च्वनीगु जूगु दु । भुइजःसि (बुढानीलकण्ठ) नगरपालिकाय् उगु बैठक च्वनी । बैठकय् बुढानीलकण्ठया उपप्रमुख अनिता लामा, मध्यपुर थिमिया उपप्रमुख विजयकृष्ण श्रेष्ठ, तोखाया उपप्रमुख मुरारी तामाङ, नागार्जुनया उपप्रमुख सुशीला अधिकारी, कागेश्वरी मनोहराया उपप्रमुख शान्ता थापा, चन्द्रागिरिया उपप्रमुख सान्नानी लामा, तारकेश्वरया उपप्रमुख सिर्जना बुर्लाकोटी, सूर्यविनायक (ख्वप)या उपप्रमुख सरिता तिम्सिना भठ्ठराई व यलया महांकाल गाउँपालिकाया उपाध्यक्ष डोल्मा माया गोलेया उपस्थिति दुगु खः ।
स्वनिगलय् निगू महानगरपालिका, झिंखुगू नगरपालिका व स्वंगू गाउँपालिका नापं यानाः २१ गू स्थानीय तह दु ।
LEAVE YOUR COMMENTS