शुरु जुल नेतातय् भारत भ्रमण

सर्वोच्चया फैसला तकं नेतातय् भारत भ्रमणय् निर्भर

येँ – प्रम केपी ओलीं संसद भंग यायेधुंकाः उकिया विरुद्ध सर्वोच्चय् मुद्दा लानाच्वंगु दुसा मेखे राजनीतिक दलत आन्दोलनय् कुहां वयाच्वंगु दु । थ्वहे दथुइ आः थीथी नेतातय्सं भारत भ्रमण याइगु क्रम नं शुरु जुया वःगु दु ।

सूत्रया कथं थीथी नेतातय्सं आः थीथी त्वहचिनाः अझ नं भारत भ्रमण याइगु सम्भावना अप्वयाच्वंगु दु । छुं न्हिं न्ह्यः जक नेकपाया वरिष्ठ नेता झलनाथ खनालं वासः यायेगु धकाः भारत झाःगु खः । सूत्रं धाःसा वय्कः वासः यायेगु धकाः दिल्ली झाःगु खःसां अन वय्कलं भारतीय संस्थापन पक्षया मनूतलिसे सहलह यानादीगु दु ।

उकथं हे समाजवादी पार्टीया नेता महन्थ ठाकुर नं छुं न्हि न्ह्यः भारत झाःगु खः । उकथं हे आः भारत वनीपिनिगु ल्याः अप्वया वने फइगु खँ सूत्रं धाःगु दु ।

नेपाःया राजनीतिइ भारतं यानाच्वंगु थ्व अप्रत्यक्ष हस्तक्षेप खःसां नेपाःया राजनीतिइ धाःसा थुकियात सहज रुपं कायेगु संस्कृति ब्वलनेधुंकूगुलिं संसद पुनस्र्थापना जुइ वा मजुइ धइगु खँ नं नेतातय् भारत भ्रमणय् हे निर्भर जुयाच्वंगु खँ सूत्रं धाःगु दु ।

नेपाःया राजनीतिइ भारत सक्रिय जूगु मू कारण अमेरिकी परियोजना मिलेनियम च्यालेन्ज कर्पोरेशन (एमसीसी) व इन्डोप्यासेफिकं यानाः खः । थ्व निगुलिं परियोजना अमेरिकाया खःसा चीनं उकियात अस्वीकार याना वयाच्वंगु दु । तर आः नेपालय् थ्व निगुलिं परियोजना पारित याकेगु निंतिं इन्डोप्यासिक योजना कथं अमेरिका, भारत, अष्ट्रेलिया व इन्डोनेसिया लगे जुयाच्वंगुलिं नेपालय् उगु परियोजना लागू यायेगु मू भूमिका भारतयात बियातःगु खँ नं सूत्रं धाःगु दु ।

सूत्रया कथं चीनं हःगु बेल्ट एन्ड रोड इनिसियटिभ (बीआरआई) या विकल्पया रुपय् अमेरिकां हःगु इन्डोप्यासेफिक योजनायात लागू यायेगु कथं प्रधानमन्त्री केपी ओलीं संसद भंग याःगु खँ नं धाःगु दु । थुगु परियोजना कथं चीनयात घेरे यायेगु अमेरिकी योजनाय् भारतं ज्या यानाच्वंगु खँ नं सूत्रं धाःगु दु ।

अमेरिकी राजदूतया धापू

नेपाःया निंतिं अमेरिकी राजदूत र्‍यान्डी बेरीं नेपाःयात गबलें नं प्रो–अमेरिकन व गुगुं नं अमेरिकी एलाइन्सय् ब्वति कायेत इनाप मयानागु खँ धयादीगु दु ।

नेपाली सेनाया कमाण्ड व स्टाफ कलेजय् अधिकृतपिंत सम्बोधन यासें वय्कलं नेपाःयात प्रो–नेपाःमि जुइमाः धकाः इनाप यानागु खँ धयासें धयादिल, ‘जिमिसं नेपाःयात न्ह्याबलें नं प्रो–नेपाःमि जुइत व थःगु सार्वभौमसत्ता व स्वायत्तताया रक्षाया प्रत्याभूति यायेत धयाच्वनागु दु ।’

राजदूत बेरीं थःपिंसं नेपाःयात अझ प्रो–नेपाः दयेकेत, थःगु तुतिइ बल्लाक चुइफयेकेत व अमेरिका लगायत छुं नं देय्प्रति निर्भर जुइ म्वायेकेत ग्वाहालि याना वयाच्वनागु खँ नं स्पष्ट यानादिल ।
अमेरिकां नेपाःयात इन्डोप्यासेफिक रणनीतिइ ब्वति कायेगु इनाप यानाच्वंगु चर्चा जुयाच्वंगु इलय् अमेरिकी राजदूत बेरीया उगु प्रतिक्रिया वःगु खः ।

राजदूत बेरीं लिपांगु इलय् अमेरिका व नेपाःया स्वापू बारे थीथी भ्रामक सुचं न्यनाच्वंगु धासें थःपिसं सैन्य एलायन्स चाहे मजुयागु खँ नं धयादीगु दु । वय्कलं धयादी, ‘गबलय् शितयुद्ध न्ह्यानाच्वंगु खः अबलय् नं जिमिसं नेपाःयात सैन्य एलायन्सय् स्वायेत इनाप मयाना ।’
वय्कलं थःगु सम्बोधनया झ्वलय् एमसीसीया बारे नं प्रतिक्रिया बियादीगु दु । एमसीसी थेंज्याःगु विकास परियोजनायात छुं मनूतय्सं सैन्य गठबन्धनलिसे स्वाःगु धासें अमेरिकी कानुनं एमसीसी फन्डिङयात सैन्य गतिविधिया निंतिं छ्यलेत पूर्ण रुपं बर्जित यानातःगु खँ नं वय्कलं स्पष्ट यानादिल ।

राजदूत बेरीं न्हू नियुक्त जुयादीम्ह अमेरिकी राष्ट्रपति जो वाइडेनया प्रशासन प्रजातन्त्र, मानव अधिकार व समानताय् केन्द्रित जूगु दु धासें कनादिल, ‘छगू प्रजातान्त्रिक, सार्वभौम, समावेशी व कानुनी शासन नालेगु जूसा जक जिमिगु राष्ट्रिय सुरक्षाया चिउताः दइ ।’