तःदँ लिपा हानं हाकुगु न्हि

भाषिक अधिकार बारे गोष्ठी व ब्यानर प्रदर्शन

येँ – वि.सं. २०५८ साल जेठ १८ गते स्थानीय निकायलय् स्थानीय भाषा छ्यले दइ मखु धकाः सर्वोच्च अदालतं याःगु फैसलाया विरुद्ध दँय्दसं जेठ १८ कुन्हु नेवाः लगायत आदिवासी जनजातितय्सं न्यायेका वयाच्वंगु हाकुगु न्हि तःदँ तकया दिपाः लिपा म्हिगः हानं न्यायेकल ।
थ्व झ्वलय् म्हिगः ‘नेपालय् भाषिक अधिकार ः दशा व दिशा’ विषयय् यलया सातोआकी भवनय् छगू बिचाः गोष्ठी जुल ।

नेपाल प्रज्ञा पतिष्ठानया पुलांम्ह उपकुलपति बैरागी काइँलाया मू पाहां कथं झाःगु उगु ज्याझ्वलय् पुलांम्ह महान्यायाधिवक्ता मुक्ति प्रधानं च्वयादीगु ज्याःपौ राजभाई जकःमिं न्ह्यब्वयादीगु खः । ज्याःपौयात कयाः डा. पुष्पराज राजकर्णिकार, सुरेश आलेमगर, आङदावा शेर्पा, जनजाति महासंघया नायः जगत बराम व गोपाल ठाकुरपिंसं टिप्पणी यानादीगु खः ।

भाषिक अधिकार मंकाः संघर्ष समितिया अध्यक्ष अमरेश नारायण झाया सभापतित्वय् न्ह्याःगु उगु ज्याझ्वः संघर्ष समिति व नेपाल आदिवासी जनजाति महासंघया मंकाः ग्वसालय् जूगु खः । गोष्ठी क्वचायेवं माइतीघर मण्डलाय् वनाः व्यानर प्रदर्शन जूगु खः । थीथी आदिवासी जनजातिया लिसें मधेशी समुदायया नं उपस्थिति दुगु उगु प्रदर्शनीया झ्वलय् ल्हातय् हाकुगु कापः चिनाः विरोध प्वंकूगु खःसा थीथी आदिवासी जनजातिया नेतातय्सं सम्बोधन याःगु खः ।