एनपीपीएया न्हूदँ हना व ३१ क्वःगु बुसादँ

येँ(नेपालभाषा टाइम्स)÷नेपाः पासा पुचः अमेरिकाय् (एनपीपीए) पाखें नेपाल संवत् ११४३ न्हूदँलिसें पुचःया स्वीछक्वःगु बुसादँ (वार्षिकोत्सव) हंगु दु । वंगु नोभेम्बर ५ तारिखकुन्हु मेरिल्याण्डया गाइथर्सवर्गय् च्वंगु स्याडी ग्रोभ मिडल स्कुलय् एनपीपीएं न्हूदँलिसें ३१ क्वःगु बुसादँ छगू विशेष ज्याझ्वः यासें हंगु खः ।

गणेद्यः पुज्यानाः शुरु जूगु भिंतुना सांस्कृतिक ¥यालीइ एनपीपीएया सत्या स्वयां अप्वः संरक्षक, जीवंकाःछि दुजःलिसें समुदायया दुजःपिंस ब्वति कयादीगु खःसा मू ज्याझ्वः जुइगु थासय् थ्यंकाः ¥याली क्वचायेकूगु खः । ¥यालीया मुख्य आकर्षणकथं यज्ञमान शाक्यं लाखे प्याखं न्ह्यब्वयादीगु खः ।

एनपीपीएया नायः मनोहर श्रेष्ठया सभापतित्वय् जूगु ज्याझ्वःया उलेज्या वय्कलं त्वाःदेवाय् मत च्याकाः यानादीगु खः । मदुम्ह वाङ्मय शताब्दी पुरुष सत्यमोहन जोशीया लुमन्तिइ छगू मिनेट मौन धारण यासें न्ह्याःगु ज्याझ्वलय् ज्वैल रंजितं अमेरिकाया राष्ट्रिय गान व सुभे सुवाल, खुसि श्रेष्ठ, अब्बे कार्की, आन्या कार्की, समृद्धि श्रेष्ठं नेपाःया राष्ट्रिय गान न्ह्यब्वयादीगु खः ।

ज्याझ्वलय् मूवक्ता कथं झायादीम्ह नांजाःम्ह नायिका आशिष्मान नकःमि प्रधानलिसें सभानायः श्रेष्ठ व दँया प्रधान सम्पादक डा. राजु तमोटं एनपीपीएया दँपौ ‘दबू’या पितब्वज्या यासें दबू व पुचःया गतिविधिया बारे जानकारी बियादीगु खः ।

एनपीपीए नायः श्रेष्ठं पाहांपिंत लसकुस यासें संस्थां याना वयाच्वंगु महत्वपूर्ण गतिविधि व ज्याझ्वःया बारे जानकारी बियादीगु खः । वय्कलं नेवाः संस्कृतिया संरक्षण व प्रवद्र्धन यायेगु ल्याखं एनपीपीएं स्थापनाकालनिसें अमेरिका व नेपालय् नं थीथी ज्याझ्वः याना वयाच्वनागु नं जानकारी बियादिल ।

ज्याझ्वःया मूवक्ता आशिष्मा नकःमिं मांभाय्या संरक्षण यायेमाःगु खँय् बः बियादिसें भाषा, संस्कृति, परम्पराया महत्व थुइकेत व विशेष यानाः भाय् सयेकेमाःगु खँ बः बियादिल । मांअबुपिंसं नं थः मस्तय्त नेवाः भासं खँ ल्हायेगुलिइ विशेष प्रोत्साहन बीमाः धासें थम्हं नेवाः भासं खँ ल्हानागु इलय् येँया नेवाःत अजू चाःगु घटना नं न्यंकादीगु खः ।

ज्याझ्वलय् नेपाल शिक्षा तथा सांस्कृतिक केन्द्र (एनइसीसी)या नायः मय्जु सरोज प्रजपति, नेवाः अर्गनाइजेसन अफ अमेरिका (एनओए)या नायः यज्ञमान शाक्य, नेपाः कम्युनिटी युएसएया नायः बैकुण्ठ श्रेष्ठ, अमेरिका–नेपाल सोसाइटी (एएनएस)या नायः सुजित अर्याल, ईनेप्लीज डटकमया प्रतिनिधि उमेश शर्मा पाहांकथं झायादीगु खः एनपीपीएया न्वकु मय्जु शान्ति श्रेष्ठं मूवक्ता, पाहांकथं झायादीपिं, पुचःया सकल दुजःपिं नापं ज्याझ्वः ताःलाकेत थीथी कथं ग्वाहालि यानादीपिं सकसितं सुभाय् देछानादीगु खः ।

ज्याझ्वःया दकलय् मेगु ब्वय् सांस्कृतिक ज्याझ्वः न्ह्यब्वःगु खः । बुद्ध भजनपाखें शुरु जूगु सांस्कृतिक ज्याझ्वलय् आजीवन दुजः यज्ञमान शाक्यं चचा प्याखं व मेम्ह आजीवन दुजः सगुन ताम्राकार व पुचःया दुजःपिंसं भिंतुना म्येँ न्ह्यब्वयादीगु खः ।

अथे हे एनपीपीएया झिंनिम्ह संरक्षक र जिथिपिं आजीवन दुजःपिं शान्ति श्रेष्ठ, रमिता महर्जन, लीना श्रेष्ठ मेनन, रेश्मी रञ्जित, रीता सिंह, माधुरी श्रेष्ठ, दीपा राजकर्णिकारं हुलाप्याखं रञ्जिता श्रेष्ठ, चाँदनी श्रेष्ठ, सीता श्रेष्ठ, अनीता खतिवडा व हिना बज्राचार्यं नेवाः म्येँ न्ह्यब्वयादीगु खः । वयां लिपाया ब्वय् एनपीपीएया नायः श्रेष्ठं न्हूपिं संरक्षक व जीवंकाःछि दुजः जुयादीपिंत दसिपौ व पीन लःल्हानादीगु खः ।

ज्याझ्वलय् संस्थाया ज्याझ्वलय् थीथीकथंया भूमिका म्हितादीम्ह नापं निरन्तर रुपं ग्वाहालि याना वयाच्वनादीम्ह संरक्षक सरिता डंगोलयात उत्कृष्ट स्वयंसेवकया सिरपाः नं लःल्हाःगु खः । दसिपौ लःल्हायेगु ज्याझ्वःलिपा नं सांगीतिक ज्याझ्वःयात निरन्तरता बिउगु खःसा थ्व दथुइ राफल चिठ्ठा नं चायेकूगु खः । लिपांगु सांगीतक ज्याझ्लवय् समिधा श्रेष्ठ, युमन श्रेष्ठ, लुजला रंजित, रोजिता श्रेष्ठ, मेद्दा जोशी आदित्य शाक्य, पासा ब्यान्डं प्रस्तुति बिउगु खः ।

एनपीपीएया न्हूदँ व बुसादँ हनाज्याझ्वलय् स्वसत्या स्वयां अप्वःसिनं ब्वति काःगु खःसा जर्मनटाउनय् नेपाली देग निर्माणया निंतिं आर्थिक ग्वाहालि नं संकलन याःगु खः । दकलय् लिपा सकसिनं नेवाः भ्वय् नकूगु खः ।