ने. सं. ११४६ बछलागा चौथी -

नेपालभाषा मचा सिरपाः लःल्हात

यल – नेवाः बस्ती नेवाः स्कुल अभियानया ग्वसालय् नेपालभाषा मचा सिरपाःय् उत्कृष्ट जूपिं मस्तय् वंगु शनिवाः थनया कोपुन्डोलय् च्वंगु होटल हिमालयय् जूगु विशेष ज्याझ्वःया दथुइ सिरपाः लःल्हात । अभियानया संयोजक दीपक तुलाधरया सभापतित्वय् जूगु ज्याझ्वलय् मूपाहां किपू नगरपालिकाया प्रमुख रमेश महर्जनं त्वाःदेवा च्याकाः ज्याझ्वःया उलेज्या यानादीगु खः ।

थीथी स्कुलया नच्चापिं मस्तय्सं नेपाःया राष्ट्रिय म्येँ व नेवाः राष्ट्रिय म्येँ हायेकाः न्ह्याःगु ज्याझ्वलय् भास्सरा स्कुलया प्रिन्सिपल मय्जु आभा अवालें लसकुस यानादीगु खः । नेपालभाषा मचा सिरपाःया निंतिं उत्कृष्ट जुयादीपिं मस्तय्त अभियानया संयोजक नापं सभानायः तुलाधरं खादा क्वखायेकादीगु खःसा मूपाहां महर्जनं दसिपौ लःल्हानादीगु खः ।

अथे हे सिरपाःया निंतिं आर्थिक संयोजन यानादीम्ह सुनीलकुमार शाक्यं द्वहलपा देछानादीगु ज्याझ्वलय् दातापिं केशव तुलाधर, प्रदीपमान ताम्राकार, कृष्णलाल महर्जन, कुमुद श्रेष्ठ, बेखाकृष्ण श्रेष्ठ, डा. विजयप्रकाश सैंजू, आदर्श तुलाधर लगायतं दां सिरपाः लःल्हानादीगु खः ।

मचा सिरपाःया निंतिं जूगु छनोटय् नर्सरीपाखें युनिक महर्जन (सुनागुथि नेवाः इ. स्कुल), एलकेजीपाखे शिभांषी बोहरा (मोर्डन नेवाः इ. स्कुल), निरेश महर्जन (एप्पल सीड) व रुक्साना महर्जन (वज्रवाराही), युकेजीपाखे समनसागर तुलाधर (मोर्डन नेवाः), नियुक्ता शाक्य (भास्सरा स्कुल) व प्रणव नकःमि (हलिं नेवाः स्कुल) उत्कृष्ट जुयादीगु खः ।

अथे हे छगू तगिमय् जेस्ना देसार (थेच्व नेवाः इ. स्कुल), सुयोग नेम्कुल (अनन्त सेकेण्डरी स्कुल) व लसना तण्डुकार (न्यू जेनिथ स्कुल), निगू तगिमय् सम्यकरत्न शाक्य (जगतसुन्दर ब्वनेकुथि) व इन्दिसा सिख्राकार (न्यू जेनिथ) स्वंगू तगिमय् सन्दिप कपाली (श्री महांकाल मा.वि.) व सलिना दुवाल (प्रभात मा.वि.) प्यंगू तगिमय् रोजिना के.सी. (हिमालय मा. वि.), अञ्जली रौनियार (श्री महांकाल) व कञ्चन प्रजापति (अन्नपूर्ण मा. वि.) व न्यागू तगिमय् रगिषा महर्जन (थेच्व नेवाः), मिलिना तुलाधर (कन्या मा.वि.) व रिपु गुप्ता शाह (कन्या मन्दिर) उत्कृष्ट जुयादीगु खः ।

उत्कृष्ट मस्त ल्ययेगु निंतिं ल्यज्या पुचलय् च्वनादीपिं जीयम श्रेष्ठ, पवित्र कसाः, उदेन न्हूसाय्मि, रेखा शाक्य, विराजकाजी राजोपाध्याय, राकेश महर्जन व रविन श्रेष्ठं ब्वँमि मस्तय्त नेपालभाषां खँल्हाबल्हा, ब्वनेगु व च्वयेगु यानाः स्वंगू विधापाखें उत्कृष्ट जूपिंत छनोट याःगु खः ।

निक्वःखुसी जूगु नेपालभाषा मचा सिरपाःया निंतिं थुगुसी मांभासं आखः ब्वंका वयाच्वंगु येँ, यल, ख्वप, तोखा, थसि, सुनागुथि, थक्वाः, किपू, लुभुया थीथी पीस्वंगू ब्वनेकुथिया चय्म्हं मल्याक नर्सरीनिसें तगिं न्यागू तकया मस्तय्सं ब्वति काःगु खः । ज्याझ्वलय् नवासें मूपाहां महर्जनं मस्तय्त नेवाः भाय् स्यन धाःसा इपिं खय् भाय्, अंग्रेजी भासाय् कमजोर जुइ धइगु गलत मानसिकता दुगु धासें वास्तविकता अथे मखु छाय्कि मस्तय्सं छक्वलं प्यंगू न्यागू भाय् अःपुक सयेके फइ धयादिल ।

नेवाः भाय् स्यन धाःसा मेमेगु भाय् सयेके फइमखु धइगु मती मतसे थनिंनिसें हे मस्तलिसे छेँय्छेँय् नेवाः भासं खँ ल्हायेगु शुरु याये धासें वय्कलं धयादिल, ‘झीसं थथे याये फत धाःसा झीगु भाय् अवश्य ल्यनाच्वनी ।’‘धायेबलय् धाःसा स्कुल स्कुलय् नेवाः भासं आखः ब्वंकेमाः धकाः पिने पिने हाला जुइगु, थःगु हे छेँ दुने खय् भाय् ल्हायेगु यानाच्वन धाःसा झीगु भाय् थहां वइमखु’, वय्कलं धयादिल, ‘झीगु भाय् झीसं मल्हायेगु खःसा मेपिं सुनां ल्हाइ ?’

थः किपूया हे हिलटाउन स्कुलया प्रिन्सिपल जुयाच्वनागु तत्कालीन इलय् एसएलसी परीक्षाय् नेपालभाषा विषयय् उत्कृष्ट ल्याः हइपिं विद्यार्थी थःगु हे स्कुलया जूगु खँय् गर्व यानादिसें वय्कलं धयादिल, ‘हरेक स्कुलं डाक्टर, इन्जिनियर, पाइलट आदि उत्पादन याइ, थ्व धइगु दक्व स्कुलं यानाच्वंगु दु, तर जिं अबलय् ब्वंकाच्वनागु स्कुलं उत्पादन जूपिं विद्यार्थी थौ वयाः साहित्यया ख्यलय् नांजाःपिं जुयाच्वंगुलिं थुकी हे नं थःत तसकं गर्व दु ।’

निर्णायकमण्डलपाखें पवित्र कसाः व न्हय्दँ दुम्ह लुँस्वां मानन्धरं नं थःगु नुगःखँ तयादीगु ज्याझ्वलय् कवि राजभाई जकःमिं न्ह्यइपुक चिनाखँ न्यंकादीगु खःसा नेपालभाषा मचा सिरपाःया निर्णायकमण्डलया दुजःपिं व ब्वति काःगु स्कुलयात मूपाहांपाखें लुमन्ति चिं नं लःल्हाःगु खः ।