संवैधानिक इजलासय् थनिंनिसें वहस

येँ – प्रधानमन्त्रीया सिफारिसय् राष्ट्रपतिपाखें संसद विघटन याःगु विरुद्ध लाःगु मुद्दायात कयाः थौं च्वनीगु संवैधानिक इजलासय् बहस जुइगु जूगु दु । संसद विघटन विरुद्ध लाःगु १९ गू मुद्दायात म्हिगः प्रधानन्यायाधीश चोलेन्द्र शम्शेर जबराया एकल इजलासं संवैधानिक इजलासय् छ्वयेत आदेश बिउगु खः ।

संसद विघटन विरुद्ध लाःगु फुक्कं रिटयात कयाः संवैधानिक इजलासय् थनिंनिसें हे सुनुवाई जुइत्यंगु दु । संवैधानिक इजलासय् न्हापा हे क्वःछिनातःगु ११ गू मुद्दा व म्हिगःया आदेश कथं थप १९ गू यानाः आः मुक्कं ३० गू मुद्दायात कयाः सुनुवाइ जुइगु जूगु दु ।
विपक्षी दलतय्गु गठबन्धनया १४६ म्ह सांसदतय्सं संसद पुनस्र्थापना नापं नेपाली कांग्रेसया सभापति शेरबहादुर देउवायात प्रधानमन्त्री दयेकेमाःगु माग यासें सर्वोच्चय् रिट तयातःगु दु ।

म्हिगः प्रधानन्यायाधीश जबराया एकल इजलासय् जूगु बहसय् रिट निवेदकपाखें अधिवक्तापिं दिनेश त्रिपाठी, लोकेन्द्र ओली, सुनिलकुमार पटेल, बद्री भट्ट, अजाय बुढाथोकी, तुलसी पराजुली, वीरभद्र जोशीपिंसं बहस यानादीगु खः ।

वय्कःपिंसं बहसया झ्वलय् संसद विघटन असंवैधानिक जूगु जिकिर यानादीगु खःसा वंगु फागुन ११ गते सर्वोच्चं याःगु फैसलाया उल्लंघन जूगु दावी नं यानादीगु खः । अथे हे अधिवक्तातय्सं सरकारं शनिवाः पेश यायेत्यंगु बजेट समेत पनेमाःगु माग यासें उकिया लागिं अन्तरिम आदेश बीत माग याःगु खः । तर अदालतं अन्तरिम आदेश धाःसा जारी मयाः ।

सरकारं थःपिंसं घोषणा यानातःगु कार्तिक २६ व मंसिर ३ गतेया मध्यावधि निर्वाचनयात ध्यानय् तयाः बजेट हयेफु धासें उकियात पने माःगु माग विपक्षी वकिलतय्सं याःगु खः ।

बहसय् अधिवक्ता दिनेश त्रिपाठीं सर्वोच्चं याःगु पुलांगु फैसलाया पूर्णपाठ तक हे मवःनिबलय् प्रम ओलीं प्रतिनिधिसभा विघटन यानाः अदालतया अपहेलना याःगु जिकिर यासें थुकी अदालतया अवहेलनाया द्वपनय् प्रधानमन्त्रीयात पुर्जी काटे यायेमाःगु माग तकं यानादीगु खः ।
उकथं हे मेम्ह अधिवक्ता लोकेन्द्र ओलीं राष्ट्रपति विद्यादेवी भण्डारी व प्रम ओली थ्व स्वयां न्ह्यःया अदालतया फैसला अःखः वनाः अदालतया मानहानी याःगु जिकिर यानादीगु खः । प्रधानमन्त्री जुइगु व पदमुक्त जुइगु थाय् प्रतिनिधिसभा जूगुलिं प्रम ओलीं विश्वासया मत कायेत मस्वःगु जक मखुसें संसदय् तकं दुहां मवँसें राष्ट्रपति व प्रधानमन्त्रीं संसदया समेत मानहानी याःगु जिकिर नं यानादीगु खः ।

सम्बन्धित बुखँ

LEAVE YOUR COMMENTS