नांजाःम्ह मचा साहित्यकार शान्तदास मानन्धर मंत, बुधवाः अन्त्येष्टि
येँ (नेपालभाषा टाइम्स)- नेपालभाषा व खस नेपाली भाषाया नांजाःम्ह मचा साहित्य च्वमि शान्तदास मानन्धर मंत । वय्कः ९० दँ दुम्ह खः । छुं ई न्ह्यवंनिसें उसाँय् मदयाच्वंम्ह वय्कः येँया वयोधा अस्पतालय् वासः याकुयाकुं थौं मदुगु खः ।
वयकःया अन्त्येष्टि कन्हय् बुधवाः पशुपतिया विद्युत शवदाहगृहय् याइगु ग्वसाः छेँजःपाखें सीदुगु दु । बुधवाः न्हिनय् १२ बजेनिसें २ बजे तक पशुपतिइ हे अन्तिम श्रद्धाञ्जली प्वंकेगु ग्वसाः दु । भाजु मानन्धरं न्यागू दशक तक मचा साहित्यया विकास, विस्तार व प्रवर्धनय् योगदान बियादीगु दु । वय्कःया थीथी विषयया २४ गू सफू पिदेनेधुंकूगु दु । वय्कलं नेपाली भासं ‘बाल कोशेली’ व नेपालभाषां ‘मचा क्यब’ नांगु मचा लय्पौ पिथनादीगु खः ।
वय्कःयात प्रगतिशील साहित्यकारया रुपय् म्हसीकेगु याः । वि.सं. २०२२ सालय् जूगु नेपालभाषाया तःधंगु आन्दोलनय् वय्कलं नेतृत्वकारी भूमिका म्हितादीगु खः ।
वयकःयात वि.सं. २०७५ साल आश्विन २५ गते ‘जगदम्बा–श्री २०७४’ सिरपाः लःल्हाःगु खः । अथे हे सन् २०१८ य् देवकोटा प्रज्ञा सिरपाः बिउगु खः ।
शान्तदास मानन्धरं प्रारम्भिक शिक्षा थँबहीया जेपी स्कूलय् यानादीगु खःसा स्नातक तह तकया अध्ययन यानादीगु दु । वय्कलं लैनचौरस्थित शान्ति विद्यागृहय् अध्यापन याकादीगु खःसा बालसेवा विद्याश्रमय् च्यादँ तक प्रधानाध्यापक कथं ज्या यानादीगु खः । वयकः केन्द्रीय मानन्धर संघया पुलांम्ह छ्यांज्ये नं खः । थ्व बाहेक नं वयकः प्रगतिशील लेखक संघ लगायत थीथी संस्थाया दुजः नं जुयादीगु दु ।
वयकः मदये छुं ई न्ह्यः तक नं कम्प्युटरय् थम्हं हे टाइप यानाः च्वयेगु ज्या यानादीम्ह खः । कोरोना महामारीया इलय् नं वयकलं छेँय् च्वनाः कोरोना ल्वयया बारे मचा भासं सफू च्वयादीगु खः ।
LEAVE YOUR COMMENTS