न्यय्च्याक्वःगु बिराट नेपालभाषा साहित्य सम्मेलनय् नीम्हेसिया रचना पाठ

ख्वप – विराट नेपालभाषा साहित्य सम्मेलन गुथि ख्वपया ग्वसालय् तलेजु बैंक्वेटय् न्यय्च्याक्वःगु विराट नेपालभाषा साहित्य सम्मेलन वंगु कौलाथ्व द्वादशिकुन्हु जुल । विराट गुथिया सल्लाहकार डा. योगेन्द्र प्रधानं सम्मेलनया उलेज्या यानादीगु खः ।

ज्याझ्वलय् नवासें वय्कलं नेवाःतय् तजिलजि व भाय् बल्लाःगु व समृद्ध जूगु खनाः छम्ह गिद्दे दृष्टिं स्वइम्ह व्यक्तिया कारणं थनया कला, संस्कृतियात झन् जक स्यंकेगुकथं थन हे राजधानी यानाः थनयासभ्यता, बैभवयात झन् जक हिबाय्चबाय् यानाच्वंगु धयादिल । वय्कलं बृहत नेपाःया कला संस्कृतिं प्रभावित जुयाः हे चीन व तिब्बतं थःपिंथाय् उगु कला संस्कृतिया प्रचार याःगु खँ नं कनादिल ।

ज्याझ्वलय् नेपाल प्रज्ञा प्रतिष्ठानया प्राज्ञ लक्ष्मी माली, नेपालभाषा एकेदेमिया दांभरि डा. पुष्पराज राजकर्णिकार, प्रदेश ३ या सांसद राजेन्द्रमान श्रेष्ठ, उपन्यासकार मथुरा साय्मि, सिद्धिदास प्रतिष्ठानया नायः नरेन्द्रभक्त हाडा, नेपाल साहित्य मन्दिरया नायः तिलकप्रकाश कायस्थ, नेपालभाषा मंकाः खलः यलया नायः ऋषिप्रसाद श्रेष्ठ, संगीत नाट्य प्रज्ञा प्रतिष्ठानया कुलपति रायनपिं पाहांकथं झाःगु खः ।

ज्याझ्वलय् नेपालभाषा विषय कयाः स्नातकोत्तर तहय् दकलय् अप्वः ल्याः हयादीम्ह नेपालभाषा केन्द्रीय विभागया राकेश महर्जनयात झिद्वः तकाया ‘विराट सुरत्न सिरपाः’ व एसइइ परीक्षाय् नेपालभाषा विषयय् दकलय् अप्वः ल्याः हयादीम्ह जगत सुन्दर ब्वनेकुथिया सुकुन्दा श्रेष्ठयात ‘नेपालभाषा पदक सिरपाः’ नं लःल्हाःगु खः । अथे हे चिनाखँ धेंधेंबल्लाः कासाय् रुपा शाही न्हाप, निलनकुमार थेच्वमि लिउ व सुयोग्य मानन्धर लियांलिउ जूगु खःसा वय्कःपिंत विराटया नायः महेन्द्रगोपाल कर्माचार्य व सिरपाःया दाता पुष्पलाल तिमिलां सिरपाः लःल्हानादीगु खः ।

थुकथं हे मदुम्ह हरिदास श्रेष्ठया लुमन्तिइ वय्कःया जहान बसन्ती श्रेष्ठं न्यय्द्वः तका दांया चेक विराटया नायःयात लःल्हानादिल । सम्मेलनय् गोविन्दमान श्रेष्ठ, लक्ष्मी माली, स्नेह साय्मि, नरेश अमात्य, अमीरमैंया रञ्जित, विमलप्रभा वज्राचार्य, शौरभ शाक्य, बसन्त नकःमि, नारद वज्राचार्य, नरेनमान महर्जन, श्याम आशा, लुमन्ति चित्रकार, समाश्री, श्रीराम श्रेष्ठ, ओमकृष्ण श्रेष्ठ, दिलकुमारी डंगोल, रामेश्वर श्रेष्ठ, कविन्द्रलाल प्रधानलिसें खुदँ दुम्ह सजगता मानन्धरं रचना पाठ यानादीगु खःसा रामकृष्ण दुवाल, सत्यनारायण मानन्धर, वीरप्रसाद भन्सारीं म्येँ न्ह्यब्वयादीगु खः ।

विराटया नायः कर्माचार्यया सभापतित्वय् जूगु साहित्य सम्मेलन दुजः प्रदीपरत्न शाक्य व नविनप्रकाश श्रेष्ठं न्ह्याकादीगु खःसा विराटया न्वकू कृष्णलाल गोजा श्रेष्ठं लसकुस यानादीगु खः । सम्मेलनय् ‘नेवाः जातिया वर्तमान आवश्यकता’यात दुवालाः डा. पुष्पराज राजकर्णिकारं मू न्वचू बियादीगु खः । विराटया ख्वाःपौ ‘ह्याउँबाला’या नीन्हय्गूगु ल्याः नं विमोचन जूगु खः ।

सम्बन्धित बुखँ

LEAVE YOUR COMMENTS