न्हूदँय् ब्वति कायेत निर्देशन

येँ – नेपाल कम्युनिष्ट पार्टी नेकपां येँ महानगर या सकल नेता कार्यकर्ता व समर्थक शुभेच्छुकतय्त थुगुसी नेपाल संवत् ११४० न्हूदँया लसताय् जुइगु सार्वजनिक ज्याझ्वलय् ब्वति कायेत निर्देशन बिउगु दु ।

थ्वहे वइगु कार्तिक १२ गते सुथय् ७ बजे नेपाल संवत् ११४० न्हूदँ क्यनीगु लसताय् येँया बसन्तपुलिं न्ह्याइगु मूल साँस्कृतिक र्‍यालीइ ब्वति कायेत निर्देशन बिउगु खः । नेकपाया येँ महानगर कमिटीया अगुवा कार्यकर्ता भेलाय् येँ जिल्ला इन्चार्ज साबित्रा भुसालं थुकथं निर्देशन बियादीगु खः ।

नेतृ भुसालं पार्टी केन्द्रीय समितिया ग्वसालय् मोहनि, नेपाल संवत् ११४०, स्वन्ति व छठ पर्वया लसताय् थ्वहे वइगु असोज २९ गते भृकुटी मण्डपय् जुइगु भिन्तुना कालबिल व चियापान ज्याझ्वलय् नं ब्वति कायेत सकलसितं इनाप यानादीगु दु । भेलां नेपाल संवत् ११४० न्हूदँ समारोह समिति नीस्वने गु निर्णय नं याःगु दु । भेलाय् प्रदेश सभा दुजःपिं बसन्त मानन्धर, नारायण सिलवाल, पार्टी जिल्ला नायः हिमाल शर्मा, महानगर कमिटीया नायः निर्मल देउलां न्ववानादीगु खः ।