जोर विजोर चले याकेत अदालतय् रिट

येँ – स्वनिगलय् अप्वयाच्वंगु सवारी साधनया चाप म्हो यायेत आः स्थायी रुपं हे जोरबिजोर प्रणाली लागू यायेमाःगु माग यासें सर्वोच्च अदालतय् रिट लाःगु दु ।
अप्वयाच्वंगु सवारी साधनं थनया वातावरणयात गाक्कं प्रभावित यानाच्वंगु कारणं आः स्थायी रुपं हे जोर गते कुन्हु जोर नम्बर व बिजोर गते कुन्हु बिजोर नम्बरया सवारी साधन चले याकेगु व्यवस्था यायेमाः धइगु माग यासें अधिवक्तापिं श्यामकुमार श्रेष्ठ व रीता कार्कीं उगु रिट दायर यानादीगु खः ।
अज्याःगु कानून दयेकेत प्रतिनिधि सभायात आदेश बीमाःगु व कानून मदयेकूतले सर्वोच्च अदालतया असाधारण अधिकार क्षेत्रया प्रयोग यानाः अन्तरिम आदेश जारी यायेत नं रिटय् माग यानातःगु दु ।

जोर विजोर प्रणाली सरकारी गाडी, अस्पताल, सेना, प्रहरी, शिक्षण संस्था आदियात धाःसा लागू यायेम्वाःगु खँ नं रिटय् धयातःगु दु ।
थथे जोर विजोर प्रणाली लागू यात धाःसा स्वनिगःया वातावरणीय प्रभाव म्हो जुयाः पर्यावरण बांलाइगु व थनया अस्तव्यस्त ट्राफिक प्रणालीइ नं गाक्कं सुधार जुइगु खँ धयातःगु दु । थ्व रिट निवेदनय् प्रधानमन्त्री व मन्त्रिपरिषद्या ज्याकू, वन, गृह, यातायात, मन्त्रालय लगायत ट्राफिक प्रहरी समेत यानाः १५ गू निकाययात विपक्षी दयेकातःगु दु ।

पठाओ थेंज्याःगु ट्याक्सी
सरकारं मोटरसाइकलं मनू ल्ह्यइगु पठाओ व टुटल सेवायात प्रतिबन्ध तये–धकाः आः अज्याःगु हे सेवा बीगु ट्याक्सी दर्ता याःगु दु । फोन यायेवं अन धाःगु खः अन हे थ्यंकीगु थ्व ट्याक्सी सेवा आः याकनं हे सञ्चालनय् वइगु खँ धाःगु दु । थज्याःगु सेवा स्वनिगः दुने २४ सै घन्टा चले जुइगु खँ धाःगु दु ।