जसपापाखें श्रेष्ठया नेतृत्वय् सरकारय् वनीगु सम्भावना

येँ – सत्तारुढ गठबन्धन दलतय् दुने सरकारय् वनेत इच्छुक जुयाच्वंपिं आपालं नेतात दुगुलिं यानाः सरकार विस्तार यायेगु ज्या लिबानाच्वंगु खँ सीदुगु दु ।

वंगु छुं न्हिं न्ह्यः च्वंगु न्यागू दलया बैठकय् प्रधानमन्त्री शेरबहादुर देउवां मन्त्रिमण्डलयात पूर्णता बी मफयाः थःगु आलोचना जुयाच्वंगु धासें याकनं मन्त्रिमण्डलय् दुथ्याइपिं नेतातय्गु नां बीत इनाप याःगु खःसा उगु इलय् जनता समाजवादी पार्टी व माओवादी केन्द्रं छन्हु निन्हुया दुने मन्त्रिमण्डलय् दुथ्याइपिं नेतातय्गु नां बीगु बचं बिउगु खः । तर निगुलिं पार्टी दुने मन्त्री जुइत इच्छुकपिं आपालं दयेवं पार्टीं सरकारय् वनीपिं नां क्वःछित हे समस्या जुयाच्वंगु खँ सूत्रं धाःगु दु ।

थ्वहे झ्वलय् जसपा संघीय परिषदया अध्यक्ष डा. बाबुराम भट्टराईया स्वकीय सचिव रोशन पोखरेलं आइतवाः वा सोमवाःया दथुइ मन्त्रिमण्डलं पूर्णता कायेफइगु खँ धयादीगु दु । वय्कलं ‘नेपालभाषा टाइम्स’ लिसे खँ ल्हायेगु झ्वलय् उगु जानकारी बियादीगु खः ।

थौं जसपाया संसदीय दलया बैठक च्वनाः वयां लिपा मन्त्रिमण्डलय् दुथ्याइपिनिगु नां क्वःछीगु तयारी जुयाच्वंगु खँ नं वय्कलं जानकारी बियादीगु दु ।
जसपापाखें मन्त्रिमण्डलय् सुयागु नेतृत्वय् वनेगु धइगु बारे नं सहलह जुयाच्वंगु खँ सीदुगु दु । पार्टी दुने अध्यक्ष उपेन्द्र यादवया हे नेतृत्वय् सरकारय् वनेगु वा नेता राजेन्द्र श्रेष्ठया नेतृत्वय् सरकारय् वनेगु बारे सहलह जुयाच्वंगु खँ सूत्रं धाःगु दु ।

जसपापाखे सरकारय् वनीपिं नेतातय् नां क्वःछिइगु बारे निर्णय यायेगु जिम्मा संघीय परिषदया अध्यक्ष डा. भट्टराई, अध्यक्ष यादव व वरिष्ठ नेता अशोक राईयात अधिकार बियातःगु दु ।

दाहालयात नं मन्त्री ल्ययेत समस्या
माओवादी केन्द्रय् नं सरकारय् वनीपिं आपालं दयेवं सरकारयात पूर्णता बीत थाकुयाच्वंगु खँ सीदुगु दु । माओवादीया आपालं नेतात सरकारय् वनेगु निंतिं थःत दबाब बियाच्वंगु खँ माओवादी अध्यक्ष पुष्पकमल दाहालं छुं न्हिं न्ह्यः स्वीकार यानादीगु खः । विशेषतः दाहालयात न्हापा मन्त्री जुइधुंकूपिं छुं नेतातय्सं थःपिंत नं मन्त्री दयेकेमाःगु अडान कयाच्वंगु दुसा मेखे न्हापा मन्त्री जुइ मखंपिं नेतापिसं न्हापां मन्त्री जुइधुंकूपिंत आः न्हूगु सरकारय् मन्त्री दयेकेगु मखुसें न्हूपिं छ्वयेमाःगु अडान कयाच्वंगुलिं मन्त्रीमण्डलय् वनीपिनिगु नां क्वःछीत दाहालयात थाकुया च्वंगु खँ सूत्रं धाःगु दु ।

सम्बन्धित बुखँ

LEAVE YOUR COMMENTS