महरां यानाः तुम्बाहाम्फेयात मार

नेकपां उपसभामुख त्वःताः सभामुख दावी याइगु
येँ – यौन काण्डय् लानाः सभामुख कृष्णबहादुर महरां राजीनामा बियादीवं न्हूम्ह सभामुख ल्ययेगु राजनीतिक समीकरणया कारणं उपसभामुख शिवमाया तुम्बाहाम्फें नं थःगु पद त्वःते मालीगु अवस्था पिहां वःगु दु ।

संविधानय् सभामुख व उपसभामुख निम्हं छगू हे पार्टीयापिं जुइ मजिउ धइगु प्रावधान तयातःगु कारणं महराया राजीनामा लिपा यदि नेकपां हानं सभामुख पदय् दावी यायेगु खःसा अज्याःगु दावी याये न्ह्यः हे उपसभामुख तुम्बाहाम्फें निं राजीनामा बीमाःगु जुइ । छाय्धाःसां उपसभामुख तुम्बाहाम्फे जुयाच्वंत्तले वय्कःया हे पार्टीं सभामुखय् दावी तकं याये दइ मखु ।

नेपाल कम्युनिष्ट पार्टीं सभामुख पद त्वःतीगु सम्भावना मदु । उकिं उपसभामुख मेपिंत बियाः जूसां सभामुख थःगु ल्हातय् लाकीगु खनेदु । उकिं न्हूम्ह सभामुख वये न्ह्यः हे तुम्बाहाम्फें पद त्वःते मालीगु खनेदु । थ्व ल्याखं महराया यौन काण्डं महरा जक मखु थ्व मामिलाय् छुं हे ल्हाः मदुम्ह उपसभामुख तुम्बाहाम्फें तकं पद त्वःते मालीगु अवस्था सिर्जना जुइत्यंगु खः ।

आः सभामुख मदुगु अवस्थाय् बैठकया अध्यक्षता उपसभामुख तुम्बाहाम्फें हे यानादी । सभामुखया न्हूगु निर्वाचन गबले यायेगु धइगु मिति तकं वय्कलं हे बियादी ।

तर छुं जुयाः वय्कलं मिति घोषणा यानादिल व नेकपां उम्मेदवारी नं बिल धाःसा सभामुख निर्वाचित यायेगु बैठकया अध्यक्षता तुम्बाहाम्फें याये दइ मखु । वय्कः नं पदमुक्त सरह हे जू वनी ।संसदया अधिवेशन क्वचाये धुंकूगुलिं न्हूम्ह सभामुख ल्ययेगु ज्या आः हिउँदे अधिवेशनं जक याइगु खँ नं धाःगु दु ।

न्हूम्ह सभामुखय् गुरुङ, मगर व नेम्बाङया दावी
सभामुख महराया राजीनामा लिपा आः न्हूम्ह सभामुख सु जुइ धइगु खँय् नं व्यापक चर्चा शुरु जूगु दु । न्हापा एमाले व माओवादी एकीकरण यायेगु झ्वलय् सभामुख माओवादीयात बियाः उपसभामुख एमालेयात बिउगु खः । आः माओवादीयाम्ह सभामुखं राजीनामा बिउगु जुयाः थ्व पदय् हानं पूर्व माओवादी खेमां हे दावी याना हःगु खँ सीदुगु दु ।

थुकिया लागिं आः देव गुरुङ व पुलांम्ह सभामुख ओनसरी घर्तीमगरं दावी याना हःगु दु । पुलांम्ह सभामुख सुवास नेम्बाङ नं थ्व दौडय् सामेल जूगु सूत्रया दावी दु । नेम्बाङं मौका बिउसा म्हाः मधायेगु बिचाः न्ह्यःने तयेधुंकूगु दु । मेखे छगू खेमां धाःसा हालया उपसभामुख शिवमाया तुम्बाहाम्फेयात हे सभामुख दयेकेमाःगु माग नं याना हःगु दु ।

वय्कः जनजाति लिसें मिसा नं जूगु कारणं वय्कःयात हे न्ह्यःने यंके माःगु उमिगु तर्क दु । तर वय्कः पूर्व एमाले जूगु कारणं पूर्व माओवादी खेमां वय्कःयात समर्थन याइगु सम्भावना धाःसा म्हो जक दुगु सूत्रया दावी दु । आदिवासी जनजाति मिसात तसकं म्हो जक च्वय्या स्थानय् थ्यनाच्वंगु कारणं वय्कःयात राजीनामा याके मजिउगु छथ्वःसिया बिचाः दु ।

सूत्रया कथं स्वयम् मय्जु तुम्बाहाम्फें नं सभामुखय् थः वने दुसा जिउ धइगु आशय प्वंकादीगु दु । पार्टीं थुकिया बारे धाःसा छुं निर्णय याःगु मदुनि ।थ्वहे झ्वलय् सभामुख महरां स्पष्ट भासं च्वयातःगु मेगु राजीनामा लःल्हानादीगु दु । तर वय्कलं सांसद पदं धाःसा राजीनामा बियादीगु मदुनि ।