गणमहाविहारय् शस्त्र परित्याग दिवस

येँ – थेरवाद बौद्ध दायक केन्द्रीय परिषद्या ग्वसालय् वंगु असोज ११ गते शनिवाः कुन्हु २२८१ क्वःगु शस्त्र परित्याग दिवस हन । थनया गण महाविहारय् जूगु ज्याझ्वःया उलेज्या येँ महानगरपालिकाया उपप्रमुख हरिप्रभा खड्गी श्रेष्ठ, विशेष पाहां विहार प्रमुख भिक्षु शोभित व परिषद्या अध्यक्षलिसें ज्याझ्वःया सभापति बखतबहादुर चित्रकारं मंकांकथं दीप प्रज्वलन यानादीगु खः ।

विशेष पाहां जुयाबिज्याःम्ह गण महाविहारया प्रमुख भिक्षु शोभित महास्थविरपाखें पंचशील ग्रहण यासें ज्याझ्वः न्ह्याःगु खः । परिषद्या उपाध्यक्ष कृष्ण कुमार प्रजापतिं लसकुस यायेगु झ्वलय् सम्राट अशोकया जीवनीया बारे चर्चा यासें कलिंगया युद्धपाखें शिक्षा कयाः चण्डाल अशोकं धर्माशोक जुयादीगु चर्चा यानादिल ।

ज्याझ्वलय् प्रा. बालकृष्ण श्रेष्ठं सम्राट अशोकया ऐतिहासिक घटनाया बारे विवेचना यासें परिषदं निरन्तर रुपं थुकथंया ज्याझ्वः याना वयाच्वंगुयात कयाः च्वछायादिल । बौद्ध विद्वान प्रा. सुवर्ण शाक्यं सम्राट अशोक व मोहनिया सम्बन्धया बारे विवेचना यानादीगु ज्याझ्वलय् परिषद्या सल्लाहकार लोकबहादुर शाक्यं नं थःगु नुगःखँ तयादीगु खः ।

मूपाहां येँ मनपा उपप्रमुख खड्गीं थुकथंया ज्याझ्वःपाखें प्रेरणा कयाः अहिंसात्क धार्मिक क्रियाकलाप येँ महानगर पालिकापाखें न्ह्याकेमाःगु खँ कनादिल । लिसें वय्कलं विश्व शान्तिया महानायक भगवान बुद्ध जन्म जूगु देशयात ल्वःगु संस्कार नालेत नं इनाप यानादिल ।

ज्याझ्वलय् शान्तरत्न शाक्यं नेपालभाषां च्वयादीगु सम्राट अशोकया जीवनीलिसे सम्बन्धित चिनाखँ ब्वनाः न्यंकादीगु खःसा मेम्ह बौद्ध विद्वान डा. लक्ष्मण शाक्यं सुभाय् देछानादीगु खः ।विहारया प्रमुख भिक्षु शोभितं मूपाहां उपप्रमुखयात मतिनाया चिंकथं भगवान बुद्धया मूर्ति लःल्हानाबिज्याःगु खःसा पुण्यानुमोदन यासें ज्याझ्वः क्वचायेकूगु खः ।