दाहालं धाल– एमसीसी पास जुइ मखु

येँ -नेकपा (माओवादी) या अध्यक्ष पुष्पकमल दाहालं एमसीसी पास मजुइगु घोषणा यानादीगु दु । म्हिगः पार्टीया सहायक संगठन योङ कम्युनिष्ट लिगया न्हापांगु केन्द्रीय समितिया बैठकयात सम्बोधन यासें अध्यक्ष दाहालं उगु खँ धयादीगु खः ।

सम्बोधनया झ्वलय् अध्यक्ष दाहालं धयादिल, ‘एमसीसी पास जुइ मखु, छाय्धाःसां जिमिसं थुकिया बारे अमेरिकायात कुटनीतिक नोट छ्वयागु दु, उकिया लिसः मवः, लिसः मवयेधुंकाः एमसीसी पास जुइगु खँ हे जुइ मखु, छिकपिं ढुक्क जुयादिसँ, राष्ट्र व राष्ट्रियताय् न्ह्यसः ब्वलनीगु खँय् माओवादी केन्द्रं सहमति क्यनेगु जुइ मखु ।’

उकथं हे अध्यक्ष दाहालं माओवादी केन्द्र नं संसदवादय् फँसे जुया वनाच्वंगु व संसदवादं बांलाःगु ज्या मयाःगु धासें वाईसीएलयात नं संसदवादय् फँसे मजुइत व फौजी संरचना कथं एकीकृत रुपं न्ह्याःवनेत निर्देशन बियादिल ।

वय्कलं आःया शासन प्रणालीयात कयाः न्ह्यसः ब्वलनाच्वंगु धासें वइगु पुसय् जुइगु राष्ट्रिय सम्मेलन लिपा पार्टीं आन्दोलनया धाकु फय् हयेमाःगु अवस्था वयेफइगु जूगुलिं उकिया नितिं तयार जुयाच्वनेत नं इनाप यानादिल ।