ने. सं. ११४४ चौलाथ्व दशमी -

पचलि भैरवया जात्रायात कयाः सहलह

येँ – मोहनि नखःया झ्वलय् कौलाथ्व पंचमि (पचिमधः) कुन्हु जुइगु पचलि भैरवया त्यप जात्रायात व्यवस्थित यायेगु ल्याखं छगू सहलह मुँज्या जुल ।श्री पचलि भैरव जात्रा व्यवस्थापन समितिया ग्वसालय् वइगु कौलाथ्व चौथि व पंचमि निन्हुयंकं जुइगु जात्रायात सभ्य, भव्य व व्यवस्थित रुपं न्ह्याकेगु ल्याखं उगु सहलह मुँज्या जूगु खः ।

क्वःनेया थकू जुजु जयराम मल्लया सभापतित्वय् न्ह्याःगु सहलह मुँज्याय् सहभागिपिंसं जात्रायात व्यवस्थित रुपं न्ह्याकेत थीथी कथंया सल्लाह सुझाव बियादीगु खः ।

ज्याझ्वलय् इन्द्रजात्रा व्यवस्थापन समितिया नायःलिसें लाय्कू कुमारिया चिताइदार गौतम शाक्य, नेपाली कांग्रेसया नेता तीर्थराम डंगोल, व्यवस्थापन समिति अन्तर्गतया बाजं उपसमितिया कजि पुष्परत्न प्रजापति, स्वयंसेवक कजि भूषण वज्राचार्य, प्रचार प्रसार कजि राजु नापित, सल्लाहकार ध्यानगोविन्द रंजित, व्यवस्थापन समितिया कजि बालकृष्ण महर्जन, सभापति मल्ल लगायतया व्यक्तित्वपिंसं जात्रा व्यवस्थापनया निंतिं म्हितेमाःगु थीथी पक्षयात कयाः नुगःखँ तयादीगु खः ।

कौलाथ्व चौथि व पंचमि निन्हुयंकं जुइगु पचलि भैरवया त्यप जात्राया झ्वलय् वंगु असोज १२ गतेकुन्हु त्यप आजुयात लंपु छायेगु निंतिं द्यःछेँय् नं क्वःहितिया पुंयाथाय् बिज्याकूगु खःसा थौं लंपु छाये सिधयेकाः थकू जुजुया छेँय् बिज्याकी । थौं हे सनिलय् थकू जुजुया छेँय् नं झासु फल्चाय् बिज्याकाः बहनि गमय् तये यंकी ।

जात्रा व्यवस्थापन समितिं बिउगु जानकारीकथं वयांलिपा पंचमिकुन्हु सुथय् ताः छुइगु, ताः कसे यायेगु ज्या जुइगु व न्हिनय् रुद्र विनायक गणेद्यःया ख्वाःसिकेगु ज्या जुइ । उकुन्हु हे सनिलय् रुद्र विनायक गणेद्यः व पचलि भैरवया जात्रा जुइ ।