राष्ट्रपति समक्ष नवदुर्गाया समस्या

ख्वप – नव दुर्गा जात्रा सञ्चालन यायेत आर्थिक समस्या जुयाच्वंगु दु । म्हिगः नवदुर्गा भवानीया दर्शन यायेत झाःम्ह राष्ट्रपति विद्यादेवी भण्डारीयात जात्रा यायेत माःगु खर्च गनं नं मवःगुलिं समस्या जूगु खँ देवगणपिंसं धाःगु खः । देवगणं नवदुर्गा जात्रा व खर्च चले यायेत आर्थिक समस्या जूगु व देवगणया अवस्था नं कमजोर जुया वनाच्वंगुलिं सरकारं उचित व्यवस्थापन यायेमाःगु माग राष्ट्रपति समक्ष याःगु खः ।

नवदुर्गा जात्राया निंतिं दँय् झिगू लाख स्वयां अप्वः खर्च जुइगु जुयाच्वंगु दु । अथेहे तलेजुया मू नाइके नरेन्द्र प्रसाद जोशीं ख्वप कुमारीया मासिक भत्ता अप्वयेकेत नं माग यानादीगु दु । देवगण व मू पुजारीयात लिसः बीगु झ्वलय् राष्ट्रपति भण्डारीं आर्थिक समस्या ज्वनाः राष्ट्रपति तक वयेम्वाःगु खँ कनादिसें स्वंगू तहया सरकार दुगुलिं समस्या ज्यंकेत स्थानीय सरकारपाखें माःगु ग्वाहालि जुइगु खँ कनादीगु दु । राष्ट्रपति भण्डारीं थ्व समस्या ज्यंकेगु निंतिं माःगु पलाः ल्ह्वनेत सांसद महेश बस्नेतयात निर्देशन बियादीगु दु ।