योगाम्बर गुथिया सेवाभाव व कर्णदिपया सुविधायुक्त व्यवस्थापन
नेवाः समाजय् सुं व्यक्ति सी धुंकाः दाहसंस्कार यायेगु ज्या जुइ । सीम्ह सिथं यंकुसांनिसें घाटय् दइगु फुक्कं अनुभव कष्टकर व थःथिति व सना वःपिंंत पीडादायी जुइके मबिसे मर्यादित व सुथां लाःगु जुइमाः धयागु खँ तसकं महत्वपूर्ण खः । थ्वहे संवेदनशीलतायात वाःचायेकाः शोभाभगवती लिक्क लाःगु ऐतिहासिक ‘कर्णदिप’ क्षेत्रयात थौंकन्हय् व्यवस्थित, सफा व आधुनिक दयेकेगु ज्याखँय् योगाम्बर गुथिं ज्या याना वयाच्वंगु दु ।
योगाम्बर गुथिं कर्णदिप व शोभाभगवती लागाया कायापलट यायेत याःगु प्रमुख ज्याखँत थुकथं दु:
खुसि पारि (निर्मल घाट) क्षेत्रया व्यापक सुधार
सीम्ह हयाः कर्णदिप थ्यंके न्ह्यः खुसि पारि (निर्मल घाट लागाय्) सीम्हेसित अन्तिम संस्कारया निंतिं तइगु थाय् योगाम्बर गुथिपाखें बांलाक सुधार व व्यवस्थापन याःगु दु । मेमेगु सी गुथियापिनि नं सीम्ह हइबलय् दकलय् न्हापां थन हे तयाः माःगु संस्कार यानाः खुसि पार यानाः कर्णदिपय् तक दाहसंस्कारया निंतिं सिथं यंकेगु याइ । थ्व सिथंयंकेगु ज्या नं सुविधापूर्वक यायेत घाटय् माःगु व्यवस्थापन यायेगु ज्या जुइधुंकूगु दु ।
कर्णदिप क्षेत्रया आधुनिकीकरण, सुचुपिचु व व्यवस्थापन
योगाम्बर गुथिं घाट लागायात न्हापा दयाच्वंगु अस्तव्यस्ततापाखें मुक्त यानाः छगू अनुकरणीय थाय् दयेकूगु दु । थनया व्यवस्थापनया निंतिं गुथिं थुकथंया ज्या याना वयाच्वंगु दु:
पूर्णकालीन कर्मचारी: घाटयात सदां सफा तयेगु, सिँ चित्ता सञ्चालन व ग्यास चेम्बर च्याकेगु ज्याय् ग्वाहालि यायेत प्यम्ह पूर्णकालीन कर्मचारी खटे यानातःगु दु ।
उच्च स्तरया सुचुपिचु: थन च्वंगु चःबि सदां सफा यानातयेगु ज्या जुयाच्वंगु दु । दसु कथं धायेबहःगु ज्या धयागु दाहसंस्कार सिधयेकाः फुक्क थासय् लखं सिलाः, वासः स्प्रे यानाः तुरुन्त सुचुकुचु याइ ।
शान्त वातावरणः सना वःपिं, शोकाकुल जुयाच्वंपिं मनूतयगु नुगःयात भचा जूसां सान्त्वना व शान्ति बीगु तातुनाः तसकं सौम्य भजन हायेकेगु साउन्ड सिष्टम जडान यानातःगु दु ।
सुविधाजनक पूर्वाधारः सना वःपिं मनूतय्सं ल्हाः–म्हुतु सिलते, म्वः ल्हुइत हितिइ न्ह्याबलें लः हायाच्वनीगु व्यवस्था दु । नापं दाहसंस्कार जुयाच्वंबलय् सनावःपिं च्वनेगु प्यारापिटय् लानातइगु सुकू लासा सदां सफा यानाः तयेगु याना वयाच्वंगु दु, गुकिं यानाः अन च्वनेबलय् सुनां नं मछिं महसुस यायेम्वालेमाः ।
नेपालय् हे दयेकूगु वातावरणमैत्री ‘ग्यास चेम्बर’ (३ नं चिता)
योगाम्बर गुथि सम्भवतः नेपाःया हे अज्याःगु न्हापांगु संस्था खः, गुकिं प्यदँ न्ह्यः हे वातारवरणमैत्री ग्यास चेम्बर (३ नम्बर चिता) या सुरुवात याःगु खः । दकलय् गर्वया खँ थ्व प्रविधि नेपाःया हे दक्ष इन्जिनियरपिं जानाः दयेकूगु खः । थ्व प्रविधिपाखें आः तक २५० म्ह सिबें अप्वः सीम्हेसिगु दाहसंस्कार तसकं म्हो जक दां खर्च जुइकथं वातावरणमैत्री रुपं याये धुंकूगु दु, गुकिं यानाः सिँ व ई निगुलिं बचे याःगु दु ।
क्रियापुत्री भवनया निर्माण
योगाम्बर सी गुथिया हे सकृयता व ग्वसालय् थन क्रियापुत्री भवन निर्माण जूगु दु । आः वयाः समाजया आपालं मनूतय्सं थ्व भवनया उपयोग यानाः अन हे क्रिया च्वनेगु व सी धुंकाः यायेमाःगु थीथी संस्कार व काजक्रियाया ज्याखँत सुथां लाक्क याना वयाच्वंगु दु ।
भावी सुधारया योजना
योगाम्बर सी गुथिया ज्या थुलिइ जक सीमित मखु । थ्व संस्थां आः वइगु दिनय् कर्णदिपया थाय् अझ ब्याकेगु व अप्वः मनू च्वने फइकथं प्यारापिट थप यानाः थ्व घाटयात अझ ब्यापक व सुविधाजनक दयेकेगु तःधंगु योजना न्ह्यःने हया तःगु दु ।
निष्कर्ष : ‘एन्ड–टु–एन्ड’ व्यवस्थापनया आवश्यकता
समाज व समुदाययात थुलि तःधंगु, निःस्वार्थ व सुथां लाःगु सेवा बिया वयाच्वंगु योगाम्बर सी गुथिं थ्व खँयात कडा रुपं महसुस याःगु दु कि– घाट व्यवस्थापन धइगु छगू जक चिता दयेकाः क्युआर कोड पाखें दां मपुतले तालं ग्वयाः तयेगु जक ज्या खँ मखु । दाहसंस्कार धइगु संवेदनशील व मानवीय सेवाया ख्यः खः ।
उकिं खुसि पारि निसें घाटया सुचुपिचु, कर्मचारी व्यवस्थापन, प्रविधि व क्रियापुत्री भवन तकया पुरा कर्णदिप क्षेत्रया ‘एन्ड–टु–एन्ड’ (भ्लम–तय–भ्लम) निःस्वार्थ हेरचाह व व्यवस्थापन यानाः न्ह्याः वनेत ताःलाःगुु इतिहास दुगु योगाम्बर सी गुथि हे आः नं थ्व क्षेत्रया पुरा जिम्मेवारी कयाः न्ह्या वने योग्य व सक्षम संस्था खः धयागु खँ थ्व ज्याखँतय्सं प्रमाणित याः ।
LEAVE YOUR COMMENTS