निजी मेडिकल कलेजं न्हू भर्ना मकाइगु
शुल्क अप्वयेकेगु निंतिं भर्ना बन्द यानाः धम्की
येँ – निजी मेडिकल कलेजतय्सं एमबिबिएस व बिडिएस तहय् भर्ना मकाइगु जूगु दु । निजी मेडिकल कलेजतय् संगठन एशोसियसन अफ प्राइभेट मेडिकल एण्ड डेन्टल कलेज अफ नेपालं यथास्थितिइ न्हूगु भर्ना मकायेगु घोषणा यायेवं निजी मेडिकल कलेजय् भर्नाय् अन्योल खनेदुगु खः ।
त्रिभुवन विश्वविद्यालय व काठमाडौं विश्वविद्यालयं चिकित्सा शिक्षा अन्तर्गत एमबीबीएस व बीडीएस तहया प्रवेश परीक्षाया लिच्वः सार्वजनिक यायेवं एशोसियसनं न्हूगु भर्ना मकायेगु घोषणा याःगु खः । निजी कलेजया सिट संख्या, शुल्क निर्धारण, विदेशी भर्ना सम्बन्धी स्पष्ट नीति, छात्रवृत्तिया अनुदान लगायतया स्पष्ट व्यवस्था मयासे सरकारं भर्ना प्रक्रिया न्ह्याकूगु धासें एशोसियसनं भर्ना मकायेगु घोषणा याःगु खः ।
त्रिवि व काठमाडौं विश्वविद्यालयं नकतिनि पितबिउगु लिच्वः कथं निगुलिं तहया प्रवेश परीक्षाय् ८ हजार ७५६ म्ह पास जूगु दु । एमबिबिएस व बिडिएस ब्वनेगु निंतिं थ्व निगू विश्वविद्यालयय् जक १९ हजार विद्यार्थीतय्सं प्रवेश परीक्षा बिउगु खः । प्रवेश परीक्षा ताःलाःपिं अध्ययन यायेगु निंतिं दकलय् अप्वः सिट धाःसा निजी ख्यःया मेडिकल कलेजय् दु ।
तर आः थुपिं मेडिकल कलेजतय्सं हे भर्ना मयायेगु धायेवं ताःलाःपिं विद्यार्थी अन्योलय् लाःगु दु । विशेषत छुं न्हि न्ह्यव जक सरकारं क्वःछिनातःगु शुल्क स्वयां अप्वः शुल्क कयातःगु कलेजतय्सं लछिया दुने अप्वः कयातःगु ध्यबा लित बीमाःगु सरकारी निर्णय लिपा एशोसियसनं थ्व पलाः ल्ह्वंगु खँ धाःगु दु ।
चितवन मेडिकल कलेजय् जूगु आन्दोलन लिपा सरकारं क्वःछिनातःगु स्वयां अप्वः शुल्क कयातःगु ध्यबा लित बीत निर्देशन बिउगु खः । चितवन मेडिकल कलेजं ध्यबा लित बीगु धाःसां सरकारया थ्व निर्णयं तम्वःपिं निजी कलेजतय्सं आः न्हूपिं विद्यार्थी भर्ना मयायेगु घोषणा यासें सरकारयात धम्की बिउगु खः ।
एशोसियसनया प्रतिनिधितय्सं म्हिगः प्रधानमन्त्री तथा मन्त्रिपरिषद ज्याकु, शिक्षा मन्त्रालय, स्वास्थ्य तथा जनसंख्या मन्त्रालय, विश्वविद्यालय उपकुलपति कार्यालय, चिकित्सा शिक्षा आयोगया ज्याकुथिइ ज्ञापन पत्र बिसें न्हू भर्ना मयायेगु खँ धाःगु खः ।
निजी कलेजतय्सं थःपिंसं लगानी यानागु भौतिक निर्माण निसें मेमेगु यक्व खर्च दुगु धासें सरकारं क्वःछिनातःगु शुल्क कथं ब्वंके मफइगु खँ धायेगु यानाच्वंगु दु । थौंकन्हय् सरकारं निर्धारण यानातःगु शुल्क अवैज्ञानिक जूगु धासें उमिसं विशेष यानाः शुल्कय् पुनर्बिचाः यायेमाःगु खँ धयाच्वंगु दु ।
थुकिया लिसें उमिसं सिट निर्धारण, विदेशी विद्यार्थी भर्ना याये दइगु अःपुगु व्यवस्था यायेमाःगुलिसेंया प्याकेजय् सहमति यायेमाःगु माग याःगु दु । एशोसियसनया अध्यक्ष बसरुद्दीन अन्सारीं छगू सुचं पितबिसें राष्ट्रिय चिकित्सा शिक्षा ऐन २०७५ पाखें निर्दिष्ट याःगु प्रावधान कथं शिक्षण शुल्क निर्धारण मयाःगु व विदेशी विद्यार्थीया भर्ना सम्बन्धय् स्पष्ट प्रक्रिया तोके मयायेकं न्हू भर्ना प्रक्रिया न्ह्याकूगुलिं विरोध यायेमाःगु खँ धयातःगु दु ।
एशोसियसनं कलेजया पूर्वाधार तयार यानाः एमबिबिएस तहय् १५० व बिडिएसय् ७५ सिट अध्यापन याकेफुगु अवस्थाय् नं उगु सिट म्हो यानाः १०० व ५० यानाबिउगु खँय् नं आपत्ति प्वंकुसें पूर्वनिर्धारित सिट ल्याः कायम यायेत, विदेशी विद्यार्थीयात नेपाल मेडिकल काउन्सिलं निर्धारण याःगु मापदण्ड कथं कायम यायेत व छात्रवृत्ति वापतया रकम अनुदानया रुपय् बीत सरकारया ध्यानाकर्षण याःगु दु ।
मन्त्रिपरिषद्या २०७५ असोज २८ गतेया बैठकं चिकित्सा शिक्षा अन्तर्गत स्नातक तहया एमबिबिएस व बिडिएसया शुल्क निर्धारण याःगु खः । एमबिबिएसया निंतिं स्वनिगलय् ३८ लाख ५० हजार व स्वनिगलं पिने ४२ लाख ४५ हजार व बिडिएसया निंतिं १९ लाख ३२ हजार ६१२ तका शुल्क निर्धारण यानातःगु दु ।
त्रिवि व काठमाडौं विश्वविद्यालयं सम्बन्धन कयाः सरकारी व निजी यानाः २२ गू कलेजं एमबिबिएस ब्वंकेगु यानाच्वंगु दु । थुकी मध्ये सरकारी पाखे चिकित्साशास्त्र अध्ययन संस्था महाराजगञ्ज, बिपी कोइराला स्वास्थ्य विज्ञान प्रतिष्ठान, पाटन स्वास्थ्य विज्ञान प्रतिष्ठान, राष्ट्रिय चिकित्सा प्रतिष्ठान (न्याम्स) लाः ।
LEAVE YOUR COMMENTS