तजाःगु थासय् न्हाय्कंया ताँ दयेकीगु

येँ – वण्डर नेपाल प्रा.लि. नांया छगू कम्पनीं नेपालय् न्हापांखुसी आकाश मार्गय् न्यासि वनेगु टावर निर्माण याइगु जूगु दु । कम्पनीपाखें छगू पत्रकार सम्मेलन यासें थुकिया जानकारी बिउगु खः । कम्पनीं थनया कमलादिइ दयेकेत्यंगु स्काइ वाक टावर निगू करोड तका लागतय् निर्माण याये त्यनागु नं पत्रकार सम्मेलनय् जानकारी बिउगु दु ।

करिब १३ रोपनी जग्गाय् दयेकेत्यंगु टावरया निंतिं जग्गा बालं कायेगु ज्या जुइधुंकूगु व वइगु स्वदँया दुने उगु टावर निर्माण यायेगु लक्ष्य कयातःगु दु । मूलतः निगू ततःजाःगु पहाड वा भवनया दथुइ न्हाय्कंया माध्यमं छगू थासं मेगु थासय् वने जीक दयेकातःगु अज्याःगु ताँयात हे स्काइ वाक टावर धाइगु खः ।

चीन, क्यानाडा, अमेरिका थेंज्याःगु देशय् अज्याःगु टावर तसकं लोकंह्वाना वनाच्वंगुलिं नेपालय् नं न्हापांखुसी अज्याःगु टावर निर्माणया कुतः यानागु कम्पनीया अध्यक्ष आकर्षण पोखरेलं पत्रकार सम्मेलनय् धयादिल ।

निगू भवन वा पहाडया दथुइ न्हाय्कं जक छ्यलाः ताँया रुपय् दयेकातइगु अज्याःगु थासं वनेबलय् मनुखं आनन्दया अनुभूति याइगु जूगुलिं थुकिया निर्माणं पर्यटकतय् आकर्षण नं अप्वइगु वय्कःया दावी दु । अज्याःगु टावर निर्माणया निंतिं वंगु स्वदँ न्ह्यःनिसें नेपाःया थीथी थासय् अध्ययन याना वया च्वनागु नं जानकारी बिउगु खः ।