हिरण्यलालया सफूकुथि जनतायात अर्पण

येँ – परराष्ट्र–विद् लिसें विद्वान च्वमि हिरण्यलाल श्रेष्ठं दयेकादीगु निजी सफूकुथि म्हिगः सर्वसाधारण जनतायात लःल्हानादीगु दु । ‘हिरण्य अन्तर्राष्ट्रिय मैत्री पुस्तकालय’ नां तयाः वय्कलं थ्व सफूकुथि जनताया नामय् अर्पण यानादीगु खः । म्हिगः थःगु ज्याःजंक्वया लसताय् जूगु छगू ज्याझ्वःया दथुइ वाङ्मय शताब्दी पुरुष सत्यमोहन जोशीं उगु सफूकुथिया उलेज्या यानादीगु खः ।

येँया चपलीस्थित भंगाल धाःगु थासय् थःगु छेँया नापसं अलग्ग हे छेँ दनाः स्वनातःगु उगु सफूकुथिइ अन्तर्राष्ट्रिय सम्बन्ध, समाज विज्ञान आदिलिसे सम्बन्धित द्वलंद्वः सफू मुनाच्वंगु दु । लिसें अन करिब ५० दँ न्ह्यवंनिसें मुंकातःगु थीथी पत्रपत्रिकाया न्युज कटिङ नं मुनाच्वंगु दु ।

सफूकुथि उलेज्या व थःगु जंक्वया लसताय् जूगु ज्याझ्वलय् न्ववासें भाजु श्रेष्ठं थौंकन्हय् सार्वजनिक सम्पत्ति निजीकरण यानाच्वंगु इलय् थम्हं निजी सम्पत्ति सार्वजनिकीकरण यानागु खँ कनादिल । वय्कःया हे तता मय्जु पूर्णदेवी अमात्यया अध्यक्षताय् जूगु उगु ज्याझ्वलय् मूपाहां जोशी लिसें मेमेपिं नं वक्तापिंसं भाजु श्रेष्ठया बारे नुगःखँ प्वंकादीगु खः ।