ने. सं. ११४४ कौलाथ्व चौथी -

मोहनि वल तर व्यापार शून्य

दिलिप शाही

येँ- मोहनि नखः न्ह्यःने हे थ्यंकः वयेधुंकलं नं स्वनिगःया व्यापार व्यवसाय धाःसा सुनसान हे जुयाच्वंगु दु । न्हापा जूसा थ्व इलय् येँया वंघः, असं, न्हूसतक थेंज्याःगु लागाय् पसः वइपिं मनूतय्सं यानाः लँय् जुइत तकं थाकुइगु खःसा थौंकन्हय् धाःसा बजारय् मनू हे म्हो खने दयाच्वंगु दु ।

मोहनिबलय् मनूतय्सं लुँ नं छुं भचा न्याना तइगु चलन दु । तर लुँ व्यवसायी तेजरत्न शाक्यया कथं थौंकन्हय् नखः न्ह्यःने वःसां लुँ न्याः वइपिं मदयाः व्यापार ठप्प जुयाच्वंगु दु । वय्कःया कथं नखः न्ह्यःने वयेवं लुँया माग अप्वइगु खःसा थुगुसी माग मदयाः व्यापार जुयाच्वंगु दु ।

वय्कलं थम्हं व्यवसाय यानागु इलंनिसें मोहनि नखः न्ह्यःने वयाच्वंगु इलय् थुकथं लुँया व्यापारय् मन्दी वःगु न्हापाखुसी अनुभव यानागु खँ कनादीगु दु । वय्कलं २०२२ सालंनिसें लुँ व्यापार न्ह्याकादीगु खः ।

बजारय् लुँ वहः जक मखु, मेमेगु ज्वलंया ब्यापार नं सुस्त जुयाच्वंगु दु । न्हू सतकया मोबाइल पसल्या राम खड्गीं मोहनि न्ह्यःने वःसां छुं कथंया सामान मीम्वाःगु खँ कनादीगु दु । न्हापा जूसां मोहनि नखः न्ह्यःने थ्यंकः वयेवं न्हूगु मोबाइल न्याइपिं म्वःम्वः दइगु खः, थुगुसी मोबाइल मीगु ला छखे हे तये मोबाइलया सामान न्याः वइपिं तकं मदु । वय्कलं थौंकन्हय् पसलय् बोनि तकं यायेगु थाकुयाच्वंगु धासें थुगुसी मोहनि व्यापार ताःलाकेत जक मखु बाः पुलेत तकं समस्या जुइफइगु खँ धयादीगु दु ।

अथे हे वसः व्यापारीतय्सं नं थुगुसी खास हे व्यापार मदुगुलिं न्हूगु सामान अर्डर यायेत समस्या जुयाच्वंगु खँ धाःगु दु । व्यापारीतय् कथं अन्तर्राष्ट्रिय बजारय् वसःया भाः थहां वनाच्वंगु व नेपालय् व्यापार मदयेवं व्यापारीतय्सं सामान आयात याये फयाच्वंगु मदु ।

वसः व्यापारी महेश श्रेष्ठं ‘नेपालभाषा टाइम्स’ लिसे खँ ल्हासें धयादिल, ‘ग्व, थुगुसी मोहनिया व्यापार ताः लाइगु सम्भावना मखना । सामान न्याइपिं तकं वयाच्वंगु मदु । मोहनि नखः गुकथं हनेगु धकाः चिन्ता जुयाच्वंगु दु ।’ मोहनि व्यापारीतय् दँया दकलय् अप्वः व्यापार जुइगु ई खः ।

सामानया आयात नं म्हो जुल
थ्वहे झ्वलय् चालु आर्थिक दँया साउन व भदौ महिनाय् नेपाः वइगु सामानया आयात नं म्हो जूगु दु । थुगु आर्थिक दँय् मुक्कं २ खर्ब ५९ अर्ब ७४ करोड तका बराबरया वस्तु आयात जूगु दु । थ्व आयात न्हायाया दँ स्वयां ५ प्रतिशत म्हो खः । वंगु दँय् थीथी वस्तु आयातय् प्रतिबन्ध तःसां नं २ खर्ब ७३ अर्ब ५९ करोड तकाया वस्तु आयात जूगु खः । तर थुगु दँय् आयातय् प्रतिबन्ध मतःसां नं १४ अर्ब तकाया आयात म्हो जूगु दु । न्हापाया दँ स्वयां नं थुगु दँय् निर्यात धाःसा २ अर्ब अप्वःगु दु । थुगुसी २८ अर्ब ६८ करोड तका बराबरया वस्तु निर्यात जूगु दुसा वंगु दँय् २६ अर्ब ४४ करोड तकाया वस्तु निर्यात जूगु दु ।