दिप संरक्षण यायेत नेवाः आन्दोलन

येँ – चाबहीया ऐतिहासिक पीगं द्यःया थासय् च्वंगु सी उइगु दिप संरक्षण यायेत संगठित रुपं न्ह्याः वनेगु निर्णय जूगु दु । म्हिगः चारुमति बिहारय् च्वंगु छगू अन्तक्र्रिया ज्याझ्वलं उगु निर्णय याःगु खः । लिसें दिप बारे अनुसन्धान यायेगु निंतिं छगू विज्ञ पुचः नीस्वनाः ज्या न्ह्याकेगु नं निर्णय जूगु खँ स्थानीय वासिन्दा सचिन शाक्यं ‘नेपालभाषा टाइम्स’ यात कनादिल ।

म्हिगःया बैठकं उगु लागा नेवाःतय् आदिभूमि खः व अन दिप दुगु बारेजानकारी याकेगु निंतिं सार्वजनिक बोर्ड तयेगु नं निर्णय जूगु जानकारी शाक्यं बियादिल ।उगु बोर्डय् निरन्तर रुपं नेवाःतय् दिप जूगुलिं सी उइ दयेमाः धकाः नं च्वयेगु निर्णय जूगु दु । उकथं हे शाक्य समुदायया दिपया निंतिं थःपिंसं छगू नक्सा दयेकाः येँ महानगरपालिकाय् पेश याना तयेधुनागु व उकियात पारित यायेगु निंतिं यँे मनपाय् दबाब बीगु निर्णय नं बैठकं याःगु दु ।

अथे हे डंगोलतय् दिपया स्ट्रक्चर मदुगुलिं आः याकनं हे स्ट्रक्चर दयेकेगु बारे नं सहलह जूगु दु । सहलह ज्याझ्वलय् अधिवक्ता सञ्जय अधिकारीं आः दिप संरक्षण यायेगु निंतिं कानुनी रुपं न्ह्याः वनेमाःगु व दबाबया निंतिं आदिवासी जनजाति महासंघ लगायत थीथी खलः पुचःयात दिप संरक्षण आन्दोलनय् दुथ्याकेमाःगु सुझाव बियादीगु खः ।

नेवाः देय् दबूया नायः नरेश ताम्रकारं संविधानय् आदिवासी अधिकार सुनिश्चित यानातःगुलिं दिप संरक्षण यायेगु निंतिं थःपिंसं न्ह्याबलें तिबः बीगु प्रतिवद्धता प्वंकादिल । वय्कलं आईएलओ १६९ कथं नं दिप संरक्षणया खँ ल्ह्वनेमाःगु बिचाः नं अन तयादीवु खः । दिप संरक्षण यायेगु निंतिं याकनं हे छगू भेला यानाः संगठन नीस्वनेगु व आन्दोलनया थीथी ज्याझ्वः न्ह्याकेगु निर्णय नं बैठकं याःगु दु ।

सम्बन्धित बुखँ

LEAVE YOUR COMMENTS