ने. सं. ११४६ चाैलागा चर्हे - मातातीर्थ चःह्रे

स्वनिगःया अवस्थां स्थानीय जनप्रतिनिधि चिन्तित

येँ (नेपालभाषा टाइम्स) – स्वनिगःया स्थानीय तहया जनप्रतिनिधितय्सं स्वनिगः कोरोना भाइरस (कोभिड-१९)या थप जोखिमय् लाःगु धासें चिउताः प्वंकूगु दु । विश्वन्यंकं महामारी रुपय् न्यना वनाच्वंगु कोरोना भाइरसया संक्रमणं स्वनिगः थप जोखिमय् लाःगु धासें थनया स्थानीय तहया जनप्रतिनिधितय्सं चिउताः प्वंकूगु खः ।

उपत्यका नगरपालिका फोरमया सचिव नापं मध्यपुर थिमि नगरपालिकाया प्रमुख मदन सुन्दर श्रेष्ठं स्वनिगःया लिपांगु अवस्था झन जटिल जुया वंगु धासें स्वास्थ्य सुरक्षाया मापदण्ड पालना मयासे न्हियान्हिथंया गतिविधि संचालन मयायेत इनाप यानादिल । वय्कलं स्वनिगःया अवस्था जटिल जुया वनाच्वंगु धासें स्वास्थ्य सुरक्षाया मापदण्ड पालना यानाः जक न्हिथंया गतिविधि संचालन यायेत इनाप यानादिल । लिसें स्थानीय तहं नं व हे कथं कोरोना संक्रमणयात नियन्त्रण यायेगु उपाय नालाः ज्या न्ह्याका वयाच्वंगु धासें थ्व बाहेकं मेगु विकल्प नं मदु धयादिल ।

मोहनि नखः सिधःसां नेपाःमिया निगूगु तःजिगु नखः स्वन्ति, न्हूदँ न्ह्यःने वयाच्वंगु इलय् बजारय् मनूतय् आपालं चहलपहल खने दयाच्वंगु व थुकिं जोखिमय् लानाच्वंगु स्वनिगलय् संक्रमणं अझ अप्वः गति काये फइगु खँय् सचेत नं यानादीगु दु ।

थौंकन्हय् देय्न्यंकं कोरोना संक्रमितमध्ये बछि स्वयां अप्वः स्वनिगलय् जक दु। थ्व हे वाःया वंगु आइतवाः देय्न्यंकं २,८३३ म्ह संक्रमितमध्ये स्वनिगलय् जक १,६२२ म्ह संक्रमित थप जूगु खःसा सोमवाः २,९३३ म्ह संक्रमितमध्ये स्वनिगलय् जक १,६३० म्ह खने दुगु खः । थुकथं देय्न्यंकं संक्रमित जूपिंमध्ये बछिं मल्याक संक्रमितत स्वनिगलय् जक खने दयाच्वंगुलिं स्वनिगःया जोखिम व जटिलपूर्ण अवस्थाय् संक्रमिततय्त उपचारया दायराय् हयेगु व इमिगु सम्पर्क वःपिंत कन्ट्याक्ट ट्रेसिङ यानाः परीक्षण यात तीव्रता बीमाःगु अति आवश्यक जूगु वय्कःया धापू दु ।

संक्रमितया उपचार व इमिगु सम्पर्कय् वःपिंत नं परीक्षणया दायरा तब्या यायेमाःगु अति आवश्यक जूसां नं नखःचखःया कारणं उकथं गतिविधि न्ह्याके मफयाच्वंगुलिं समस्या जुयाच्वंगु दु । संघीय सरकारनिसें स्थानीय सरकारं स्वास्थ्य मन्त्रालयं जारी याःगु स्वास्थ्य सुरक्षा मापदण्ड पालना यायेत निर्देशन बिउसां सर्वसाधारणत नं अनावश्यक रुपं पिहां वयेगु व सुरक्षा मापदण्डयात नं हाचां गायेगु ज्या तीव्र रुपं जुयाच्वंगु दु । पिहां वःपिंसं नं मास्क मतयेगु, लाक्वपाक्व धंगं सामूहिक गतिविधिइ संलग्न जुइगु, भौतिक दूरी कायम मयायेगु थेंज्याःगु गतिविधि लिपांगु इलय्स्व निगलय् अप्वया वनाच्वंगु दुसा थज्याःगु गतिविधि नियमन यायेगु व पनेगु ज्याय् नं सुरक्षा निकायं खास हे चिउताः तयाच्वंगु खनेमदु ।

थ्व हे झ्वलय् कोरोना संक्रमणयात पनेत गुकथं न्ह्याः वनेगु धइगु खँय् सहलह ब्याकेत बैठक च्वनेगु तयारी जुयाच्वंगु फोरमया उपाध्यक्षलिसें यल महानगरपालिकाया प्रमुख चिरिबाबु महर्जनं कनादिल । लुमंकेबहजू फोरमं स्वनिगलय् कोरोनाया जोखिम पनेत न्हापांनिसें स्वनिगः दुहां वयेगु नाकाय् सिल यायेमाःगु, सार्वजनिक यातायात प्रवेशय् रोक लगे यायेमाःगु लगायतया सुझाव बिउगु खः । उगु सुझाव कार्यान्वयन मजूगुलिं आः एकीकृत रुपं मखसे थःथःगु नगरयात बचे यायेत जनप्रतिनि थःपिं हे खटे जुइगु थुकिया निंतिं अभियान न्ह्याकेगु तयारी जुयाच्वंगु वय्कलं कनादिल ।