किपुली दयेकीगु युद्ध पार्कया निंतिं मूर्ति

किपू – पृथ्वी नारायण शाहं गुगु थासय् च्वनाः किपूमितलिसे युद्ध याःगु खः पाय्छि वहे थासय् किपू नगरपालिकां दयेकीगु ‘युद्ध स्मारक पार्क’ या लागिं मूर्ति निर्माण ज्याया न्हापांगु चरण थौं क्वचायेत्यंगु दु । युद्ध पार्कय् तयेगु लागिं धकाः किपू नगरपालिकां वंगु झिंन्यान्हु न्ह्यः अन छगू मूर्ति कार्यशाला शुरु याःगु खः । उकी देय्या थीथी थासं वःपिं २८ म्ह मूर्तिकारतय्सं मूर्ति दयेकेगु ज्या याःगु खः ।

उकी मध्ये मूर्तिकार लाल बहादुर लामां ला याकःचां हे प्यंगू तक मूर्ति दयेकूगु खः । फुक्कं यायेबलय् अन ३० गू स्वयां अप्वः मूर्ति दयेके क्वचाःगु दु । थौं कार्यशाला क्वचाःगु लसताय् छगू समारोह यासें सकसितं दसिपौ लःल्हाइगु ज्याझ्वः दु । किपू नपां न्हापा पृथ्वीनारायण शाहं युद्ध याः वःगु थासय् हे थ्व युद्ध पार्क दयेकेत्यंगु खः ।
अन पःखाः लिसें किल्ला समेत दयेकाः थ्व मूर्तित ब्वयेगु खँ किपू नपाया मेयर रमेश महर्जनं ‘नेपालभाषा टाइम्स’ यात कनादिल ।

वय्कलं कनादी कथं युद्ध पार्कया लागिं थुलि जक मूर्ति दयां मगाः । थ्वयां लिपा पार्क दयेकु दयेकुं आवश्यक मूर्तित नं दयेकेगु ज्या जुइ । थ्व मूर्ति दयेकेगु ज्याया संयोजन यानादीम्ह लक्ष्मीकुमार महर्जनं कनादी कथं थ्व पार्क दयेके सिधयेवं किपूया थ्व लागा पर्यटकीय ल्याखं अप्वः महत्वपूर्ण जुइ । नेपाल ललितकला प्रतिष्ठानया ग्वसालय् थ्व कार्यशाला जूगु खः । अन मूर्ति दयेकूगु स्वयेत वंगु छुं ई न्ह्यवंनिसें आपालं मूर्ति सम्बन्धी विज्ञ व सञ्चार माध्यमत नं थ्यनाच्वंगु खः ।