ने. सं. ११४४ कौलाथ्व पारू - नःलास्वनेगु

गरिब व जेहेन्दार विद्यार्थीया निंतिं च्यारिटी बजाः

येँ – ग्लोबल नेपाः नेटवर्कया ग्वसालय् जापानय् च्यारिटी बजार जुइगु जूगु दु । आर्थिक स्थिति कमजोर व जेहेन्दार विद्यार्थीतय् ग्वाहालिया निंतिं नेटवर्कं कथंया च्यारिटी बजाःया ग्वसाः ग्वयेत्यंगु खः ।जापानया राजधानी टोकियोया सिन कोइवास्थित ठमेल हलय् उगु च्यारिटी बजार जुइत्यंगु खः ।

नेटवर्कया संयोजक सुनील कुमार शाक्यं बियादीगु जानकारी कथं आर्थिक स्थिति कमजोर जूपिं जेहेन्दार विद्यार्थीतय्त ग्वाहालि यायेगु ल्याखं उगु च्यारिटी बजाः जुइत्यंगु खः । बजारय् मीत थीथी हलज्वलं मुने धुंगु व उकियात मियाः वःगु ध्यबाः दक्वं गरिब विद्यार्थीतय् निंतिं लःल्हायेगु नं संयोजक शाक्यं कनादिल ।

आर्थिक अवस्था कमजोर जूपिं नेपाःया विद्यार्थीतय् निंतिं ग्वाहालि यायेगु ल्याखं जुइत्यंगु उकथंया बजाः ग्वसाःया निंतिं द्वलंद्वः बांबांलाःगु लं व मेमेगु नं आपालं हलज्वलं प्राप्त जूगु व अज्याःगु हलंज्वलं जापानी नागरिकतय्सं तकं उपलब्ध याकूगु नेटवर्कं जानकारी बिउगु दु ।च्यारिटी बजाःया निंतिं जापानी नागरिकतय्सं यानादीगु ग्वाहालिप्रति आभारी प्वंकादिसें नेटवर्कया संयोजक शाक्यं बजारय् मीगु सामान १० जापानी येननिसें उपलब्ध जुइगु जानकारी बियादिल ।

नेटवर्कं ग्वसाः ग्वयेत्यंगु थुकथंया च्यारिटी बजाः थ्व निक्वःखुसी खः । थ्व स्वयां न्ह्यः थगुने अक्टोबर महिनाय् जँलास्येँया ल्वचं कयाच्वंम्ह फोटो पत्रकार आशाकाजी महर्जनया ग्वाहालिया निंतिं नं थुकथंया हे बजाःया ग्वसाः ग्वःगु खः ।