सम्पदा संरक्षण जडताया पुजा मखु

अबलय् । जिमि छखा छेँ दु । जनबहालय् । छेँया न्ह्यःने छगः देगः दु । अबलय् छेँ ततःजायेक दनेगु चलन मदु । देगःया जाः स्वयां छेँ थकाये मजिउ । जनविश्वास । ख ला थ्व विश्वास धार्मिक खः । थौंया वैज्ञानिक मिखां स्वयेबलय् थ्व अन्धविश्वास हे खः । तर अन्धविश्वास खयानं थ्व सहरी विकासय् छगूकथंया अनुशासन कायम याःगु खनेदु ।

अबलय् । येँय् छेँखा पल्लिइ च्वनेबलय् प्यखेरं खंकेफु । थौं थें मिखा तिसिनाः ततःजाः यानाः छेँ दनेगु चलन मदुगुलिं नगरया संरचना सन्तुलित खनेदु । तर मनूतय्के न्हूगु चेतना लुल । धार्मिक अन्धविश्वासं मनूतय्त चिनातये मफुत । धार्मिक अन्धविश्वास मनूतय् स्वतन्त्र विकासया निंतिं पंगः खः । थुकिं चिका च्वने मजिउ ।

मनू विवेकशील प्राणी । विवेकं ज्या कायेमाः । वैज्ञानिक युग । अन्धविश्वासय् ततः क्यना च्वने मजिउ । थज्याःगु चेतनाया विकास जुसेंलि थुकिया विचाः नगर संरचनाया विकासय् नं लाइ । देगः स्वयां छेँया जाः थहां वने मजिउ । थ्व धार्मिक वजनायात मनूतय्सं चिउताः तइमखु । अःखः चुनौति बी । फुपिंसं, दुपिंसं ततजाःगु छेँ दना हइ ।

प्यतँ जाःया नक्सा पास याः । च्यातँ जाःया छेँ दनी ।थौं नगर विकास, सहरीकरण पिने योजनाया नामय् जुइ । गुगु वैज्ञानिक धाइ । तर योजना, विकासया नामय् अराजक, अवैज्ञानिक, असुन्दर सहर, नगरया निर्माण याइ । म्हिगः अन्धविश्वासं थामय् यानातःगु नगरया सन्तुलन, सौन्दर्य थौंया कथित धुरन्धर योजनाविद्, नगर विशेषज्ञतसें थामय् याये फइमखु ।

विश्वं हे अमूल्य सम्पदाकथं मान्यता बियातःगु नेपाःया कला, संस्कृति, ऐतिहासिक नगर थौं तःधंगु जोखिमय् लायेधुंकूगु दु । थुकियात तासया छेँ थुं थें थुनेगु कुत्सित मनसाय कयाः अनेक तत्वत सक्रिय खनेदु ।

अझ नगर विकासया नामय् थौं स्वनिगःया प्रमुख नगरत न्हियान्हिथं विनाशपाखे वनाच्वनी । थौं छेँ दनेत नगरपालिकां नक्सा पास याकेमाः । नगरया संरचनाय् सन्तुलन व सौन्दर्य कायम यायेगु खँय् नगरपालिकातय् तःधंगु भूमिका दु । तर, थौं नक्सा पास धइगु किसिया क्यनेगु वा थें जुइ । मात्र औपचारिक । छेँ दना यंकेबलय् नक्सा कथं हे जक दना यंकेमाः धइगु बाध्यता मदु ।

दइमखु । ध्यबा, शक्ति माःकथं छ्यले फत कि नक्सा विपरित छेँ दनेत छुं थाकु मजू । स्वतनत्रता दइ । थौंया तथाकथित नगर विकास धइगु हे गुगुं विवेकशील, दूरदर्शी योजनाया उपज मखु । बरु थ्व थौं देशय् विद्यमान राजनीतिक, प्रशासकीय भ्रष्टाचार, अनुशानहीनता व अराजकताया अब्बल दृष्टान्त खः । गुकिया प्रतिफलं थौंया येँ, यल नगरत झन्झन् कुरुप, विकृति जुया वयाच्वंगु दु ।

नगरपालिकातय्सं इलय्व्यलय् अनियमितकथं छेँ दंपिंत, दनेगु यानाच्वंपिंत सम्पर्क तः वा धाइ । उखेंथुखें ध्यबा कयाः अनियमिततायात नियमितताय् हिइका बी । बस् फछ्या । मनोमानी धंगं छेँ दनाः थौं नगरयात हे करुप याःपिंत मुक्त यानाबी । थौं देशय् नगर योजना धइगु हे ध्यबा ह्वलाः न्ह्यागु नं यायेत स्वइपिन िल्हाती लानाच्वंगु दु ।

स्वनिगःया येँ, यल, ख्वपय् थें यक्व सांस्कृतिक, ऐतिहासिक, नगर, स्थलत दु । विश्वया न्ह्यःने नेपाःया पहिचान थनया कला, संस्कृति, इतिहासं बियाच्वंगु दु । तर विश्वं हे अमूल्य सम्पदाकथं मान्यता बियातःगु नेपाःया कला, संस्कृति, ऐतिहासिक नगर थौं तःधंगु जोखिमय् लायेधुंकूगु दु । थुकियात तासया छेँ थुं थें थुनेगु कुत्सित मनसाय कयाः अनेक तत्वत सक्रिय खनेदु ।

थौं स्वनिगःयात आधुनिकीकरण यायेत थनया सम्पदामोह तःधंगु पंगः जुयाः वयाच्वंगु दु । सम्पदाया चिउताः मतसे निर्वाधरुपं स्वनिगःया आधुनिकीकरण याये दयेमाः धकाः थौं छम्ह शक्तिशाली नगर योजनाकार धुं थें गर्जे जुइत स्वइ । थज्याःगु गर्जनयात थौ स्वनिगःवासीतय्सं तःधंगु चुनौतिकथं कायेमाःगु दु । गुथिया खँय् स्वनिगःवासीत जुरुमुरुं दन ।

छधी जुल । तर गुथिया संरक्षण जक थौंया समस्या मखु । येँ, यल, ख्वपया सलंसः दँ न्ह्यःया कला, संस्कृति, इतिहास, भाषा, कला, साहित्य, सम्पदाप्रतिया चिउताः नं थौ उतिकं महत्वपूर्ण सरोकारया विषय जुइ । थौं थुकिया संरक्षणया निंतिं नं स्वनिगःवासीतयसं एक्वद्धता क्यनेमाः । मखुसा येँ, यल, ख्वपया सम्पूर्ण सांस्कृतिक, कलात्मक भवनत थुनाः पाँचतारे होटल, दयेकीपिं सक्रिय गिरोहतयसं थःगु म्हगस पूवंकेत सफल जुइ ।

आः अविलम्ब येँ, यल, ख्वपयात सांस्कृतिक नगर धकाः राज्यं घोषणा यायेमाः । नगरपालिकां थनया स्थानीय, विकासया योजना, नक्सा पास, सांस्कृतिक नगरया नामय् न्ह्याकेमाः । ध्यबा ह्वलीपिनि स्वार्थ पूवंकेत, थःगु नगरया पहिचानयात नष्ट याये दइमखु ।

सम्पदा संरक्षण धइगु जडताया पुजा मखु, पश्चगमन मखु । वर्तमान आर्थिक समृद्धिया आधार थौं देय्या पर्यटन, उद्योग मूल खः । जुइ । नेपाःया सन्दर्भय् सम्पदा संरक्षण नं पर्यटन उद्योगया विकास, प्रवद्र्धनया निंतिं छगू पूर्वाधार खः । मूल आधार जुइ ।

सम्बन्धित बुखँ

LEAVE YOUR COMMENTS