चीनया उच्चस्तरीय भ्रमण छाय् ?

येँ (नेपालभाषा टाइम्स)- चीनया स्वंगूगु वरियताया नेता ली चाङ्शू नेपाः भ्रमणया झ्वलय् सोमवाः येँय् थ्यंकः वःगु दु । सभामुख अग्नि सापकोटाया ब्वनाय् नेपाः वःम्ह ली चिनिया राष्ट्रपति सी जिनपिङया भ्रमण लिपा नेपाः थ्यंकःवःम्ह दकलय् वरिष्ठम्ह नेता खः । ली चीनया नेशनल पिपल्स कंग्रेसया स्थायी समितिया अध्यक्ष खः । थ्वयां न्ह्यः वंगु मार्चय् चिनियाँ विदेशमन्त्री वाङ यी व जुलाइलय् चिनियाँ कम्युनिष्ट पार्टीया अन्तर्राष्ट्रिय विभागया प्रमुख लिउ जियान्छाओं नेपाः भ्रमण याःगु खः ।

छुं ई न्ह्यवनिसें चीनया वरिष्ठ नेतात झ्वःलाक्क नेपाः भ्रमणय् वयाच्वंगु दु । न्हापा जूसा नेपाःयात खास हे ध्यान मतइगु चीनं थौंकन्हय् विशेष ध्यान तयाः वरिष्ठ नेतात हे थुकथं छाय् वयाच्वन धयागु चर्चा जुयाच्वंगु दु । चिनिया नेतात थुकथं नेपाः वयाच्वंगु मू कारण नेपाःयात कयाः अमेरिकाया ध्यान अप्वयाच्वंगुलिं खः धाःगु दु । छुं ई न्ह्यव जक चीनं मययेकाच्वंगु अमेरिकी मिलिनियम च्यालेन्ज परियोजना (एमसीसी) नेपाःया संसदं पास याःगु दुसा तिब्बत व ताइवानयात कयाः चीन व अमेरिका दथुइ विवाद तच्वयाच्वंगु दु । थ्व हे इलय् अमेरिकी प्रतिनिधित नेपाः वयेगु अप्वयाच्वंगु दु । थुकियात हे ध्यानय् तयाः चिनियाँ नेतात नेपाः वयाच्वंगु विश्लेषण जुयाच्वंगु दु ।

एमसीसी पारित जुइधुंकाः नेपालय् अमेरिकी सक्रियता अप्वयाच्वंगु दुसा नेपाःया उत्तरी क्षेत्रय् अमेरिकीतय् उपस्थिति अप्वयाच्वंगु दु । अथेहे तिब्बतयात कयाः अमेरिकां चीनयात दबाब बीगु रणनीति नालाच्वंगु दु । तिब्बतलिसे स्वाःगु नेपाःया उत्तरी क्षेत्रय् अमेरिकी सक्रियता अप्वःगु कारणं चीनं नेपाःयात तसकं महत्व बियाः स्वयाच्वंगु खः । चीनया सिचुआन विश्वविद्यालय अन्तर्गतया इन्ष्टिच्यूट अफ साउथ एशियन स्टडीजया गाओ ल्याङं बिबिसीलिसे खँ ल्हासें धाःगु दु, ‘विश्वब्यापी रुपं खनेदयाच्वंगु नाटकीय भूराजनीति परिवेशय् हिमालय क्षेत्रय् स्थिरता व समृद्धि

कायम यानातयेत नेपाः व चीनया साझा हीत खः ।’ थ्व हे परिवेशय् चीन व नेपाःपाखें उच्चस्तरीय भ्रमण जुयाच्वंगु वय्कः धापू दु ।
अथेहे चीन अध्ययन संस्थानया महासचिव उपेन्द्र गौतमया कथं नेपाः भ्रमणय् वइपिं चिनिया नेतातय् मू चिउताः धयागु थःगु देय्या सुरक्षा स्वार्थ हे खः । उकिं थथे भ्रमणय् वइपिं नेतातय्त नेपालं सुरक्षाया मामिलाय् आश्वस्त यानाछ्वयेमाःगु वय्कःया सुझाव दु ।

गौतमया धापू दु, ‘एमसीसी विशुद्ध आर्थिक सहयोग जूबलय् तक चिनियातय् खास हे चिउताः मदुगु खः, तर रणनीति स्वार्थलिसे स्वाना वयेवं समस्या वःगु दु । उकिं नेपाः सरकारं चीनयात विश्वासय् कयाः ज्या यायेफयेकेमाः ।’

वय्कलं थौंकन्हय् नेपाःया परराष्ट्र सम्बन्धय् विश्वासया संकट खनेदुगु धाःसां विश्वसनीयता अप्वयेकेत नेपाः सरकार व राजनीतिक नेतृत्वं ज्या यायेमाःगु सुझाव नं वय्कःया दु ।

सोमवाः नेपाः थ्यंकः वःम्ह चिनिया नेता लीं नं नेपाःया सरकार प्रमुख, शीर्ष राजनीतिक नेतातय्त नापलाइबलय् थ्व हे चिउताः प्वंकीगु जुइ । चिनिया नेता लीं राष्ट्रपति विद्यादेवी भण्डारी, प्रधानमन्त्री शेरबहादुर देउवा लिसें एमाले अध्यक्ष केपी ओली व माओवादी केन्द्रया अध्यक्ष पुष्पकमल दाहालयात नापलाइगु ज्याझ्वः दु ।

सम्बन्धित बुखँ

LEAVE YOUR COMMENTS