प्रज्ञा प्रतिष्ठानं न्यायेकल महाकविया १५२ दँ बुन्हि

येँ – महाकवि सिद्धिदास महाजुया १५२ दँ बुन्हिया लसताय् नेपाल प्रज्ञा प्रतिष्ठानं म्हिगः छगू कार्यशाला गोष्ठी यात । प्रतिष्ठानया साहित्य (मातृभाषा) विभागया ग्वसालय् जूगु उगु कार्यशाला गोष्ठीइ डा. ओमकारेश्वर श्रेष्ठं सिद्धिदास महाजुया व्यक्तित्व व कृतित्वयात कयाः ज्यापौ न्ह्यब्वयादीगु खः । उकियात कयाः प्रा. प्रेमशान्ति तुलाधरं टिप्प्णी यानादिल ।

वय्कःपिंसं सिद्धिदास महाजुं वासः पसलय् ज्या यायां नं नेपालभाषाया काव्ययात च्वन्ह्याकाः नेपालभाषायात पुनर्जीवन बीगु ज्याय् यानादीगु योगदानया चर्चा यानादीगु खः । लिसें ज्याझ्वलय् गायक पवित्र कसां सिद्धिदास बारे च्वयातःगु निपु म्येँ हालाः न्यंकादीगु खःसा रमेशकाजी स्थापित व कृष्णभक्त बोडें सिद्धिदासं च्वयादीगु कविता पाठ यानादीगु खः ।

विभागया प्रमुख लक्ष्मी मालीया सभापतित्वय् जूगु उगु ज्याझ्वलय् प्रज्ञा प्रतिष्ठानया कुलपति गंगाप्रसाद उप्रेति व सदस्य सचिव जगतप्रसाद उपाध्यायं ज्याझ्वलय् सिद्धिदास बारे यक्व खँ सीके खनाः ज्याझ्वः तसकं ताःलाःगु बिचाः तयादिल ।