नेपाः–चीन २० बुँदे सम्झौता
सगरमाथाया न्हूगु उचाई निगुलिं देय् जानाः घोषणा याइगु
येँ – नेपाःलिसे १४ बुँदा दुगु मंकाः वक्तव्य जारी यासें चिनियाँ राष्ट्रपति सी चिनपिङ म्हिगः स्वदेश लिहां झाल । म्हिगः थनया होटल सोल्टीइ चिनियाँ राष्ट्रपति चिनपिङ व नेपाःया प्रधानमन्त्री केपी ओलीपिनि समक्ष जूगु ‘साइनिङ सेरेमोनी’इ निगू देय् दथुइ १८ गू सम्झौता व निगू लेटर अफ एक्सचेन्जय् हस्ताक्षर जूगु खः ।
थ्व हस्ताक्षर लिपा निगू देशं जारी याःगु मंकाः वक्तव्यय् थ्वहे हस्ताक्षर जूगु सम्झौताया खँ उल्लेख यानातःगु दु । चीन व नेपाःया दथुइ केरुङंनिसें येँय् तक रेल हयेगु धकाः जक खँ जुयाच्वंगु खःसा थुपालय् धाःसा केरुङनिसें सुरुङ मार्ग दयेकेगु खँ नं दुथ्याःगु दु । चीनं थुकिया लागिं सम्भाव्यता अध्ययन यायेगु खँ धाःगु दु ।
म्हिगः जूगु सम्झौताय् गृह, परराष्ट्र, भौतिक पूर्वाधार तथा यातायात, कृषि, उद्योग वाणिज्य, जलस्रोत, उर्जा, व आपूर्ति मन्त्रालयलिसे सम्बन्धित ज्याखँत दुथ्याः । थ्वहे इलय् येँ महानगरपालिकां चीन नान्जिन शहरलिसे भगिनी सम्बन्ध स्थापना यायेगु सम्झौता नं दुथ्याः । उकिया लागिं ताःई न्ह्यवंनिसें कुतः जुयाच्वंगु खःसा साकार रुप कायेगु ज्या धाःसा म्हिगः जूगु खः ।
निगू देय् दथुइ जूगु सम्झौताय् नेपाःया त्रिभुवन विश्वविद्यालय दुने चीनया कन्फुसियस सेन्टर चायेकेगु लिसें केरुङंनिसें येँ व येँनिसें लुम्बिनी तक रेलवे सञ्चालन यायेगु बारे सम्भाव्यता अध्ययन यायेगु खँ नं दुथ्याः । अथे हे निगू देय् दथुइ भुखाय् सम्बन्धी मोनिटरिङ नेटवर्क प्रोजेक्ट सञ्चालन यायेगु खँ नं दुथ्यानाच्वंगु दु ।
थौंकन्हय् नेपालं सगरमाथाया उचाई नापे यायेगु ज्या यानाच्वंगु दु । थ्व ज्या क्वचायेवं उकिया न्हूगु उचाई नेपाः व चीन नापं जानाः घोषणा यायेगु सहमति नं जूगु दु । उकिया अर्थ नेपालं यानाच्वंगु सगरमाथाया उचाई मापन ज्यायात चीनं मान्यता बी धाःगु खः ।
चीनं तत्कालया लागिं नेपाःयात ५६ अर्ब तका बराबरया आर्थिक ग्वाहालि यायेगु सहमति नं जूगु दु ।चिनियाँ राष्ट्रपति निन्हु नेपाः च्वनादीसां वय्कःया नेपाःया भूमिइ कुल साढे २१ घन्टा च्वनादीगु खँ धाःगु दु ।
LEAVE YOUR COMMENTS