
येँ – समाजवादी पार्टीया ग्वसालय् वंगु मंगलवाः थनया अनामनगरय् ‘नेपाली समाजया प्रगतिशील रुपान्तरणया सन्दर्भ’यात कयाः छगू अन्तक्र्रिया ज्याझ्वः जुल । ज्याझ्वलय् नवासें पार्टीया सहअध्यक्षलिसें प्रतिनिधि सभा सदस्य राजेन्द्र श्रेष्ठं नेपाःया कम्युनिष्टतय्सं बहुजातीय देशय संघीयताया सम्बन्धय् कार्ल माक्र्सया धारणायात खतराया घन्टी तायेकाः सुचुकूगु द्वपं बियादिल ।
वय्कलं नेपालय् नेपाल कम्युनिष्ट पार्टी (नेकपा) व छुं छुं जातीय पार्टीतय्सं कार्ल माक्र्सं वर्गीय मुक्तिया जक खँ ल्ह्वंगु धकाः भ्रम न्यंकेत स्वयाच्वंगु धयादिल ।
बेलायतय् अंग्रेजतय्सं आइरिसतय्त दमन याःगु इलय् बेलायत थेंज्याःगु बहुजातीय देशय् संघीय शासनया आवश्यकता बारे सन् १८६७ लय् अनया श्रमजीवितय्त च्वःगु पौ व च्वसुया प्रसंग न्ह्यथनादिसें वय्कलं धयादिल, ‘माक्र्सं जातीय हिंसा जुयाच्वन धाःसा आइरिसतय्गु आत्मनिर्णयया अधिकारया सम्मान यानाः इमित स्वतन्त्रता बीमाः धासें वयां लिपा संघीयताय् वनेमाःगु खँ ल्ह्वंगु खः ।’
थःपिं एमालेया नेतृत्वय् दुगु इलय् बहुजातीय देशय् माक्र्सया थ्व हे धारणा विश्वन्यंकंया कम्युनिष्टतय्सं अवलम्बन याःगु प्रसंगयात नं कुलादिल ।
नेपाः नं बहुजातीय देय् जूगुलिं पहिचानसहितया संघीयताया विकल्प मदुगु खँय् बः बियादिसें थ्व खँयात थःपिंसं ल्ह्वनागु इलय् नेतात नाजवाफ जूगु व पहिचानयुक्त झिंन्यागू प्रदेश सहितया अवधारणा पारित यानाः न्हापांगु संविधानसभाय् छ्वयागु इलय् तात्कालीन एमालेया नेतातय्सं उकियात पारित मयासे जालसाजी याःगु द्वपं नं वय्कलं बियादिल ।
विश्वय् कम्युनिष्ट मोडेलया राजकीय समाजवाद व नेपाली कांग्रेसं पश्चिम युरोपया एकल जातीय देय्या उदारव समाजवादया नक्कल यायेत स्वःगुलिं निगुलिं पार्टी असफल जूगु वय्कःया दावी दु । नेता श्रेष्ठं २१ औं शताब्दीइ नेपाःयात ल्वःगु व नेपाली विशेषतायुक्त समाजवादया रुपय् समाजवादी पार्टीं समुन्नत संघीय समाजवादयात नेपाली समाजयात हिउपाःया मौलिक लँपुकथं न्ह्यःने हःगु नं दावी यानादिल ।
LEAVE YOUR COMMENTS