सोमवाःनिसें येँया छेँय् छेँय् मेलम्चीया लः

येँ (नेपालभाषा टाइम्स)- वइगु सोमवाःनिसें येँय् मेलम्चीया लः इनीगु जूगु दु । मेलम्चीया लः आइतवाः तक महाँकाल चौरय् थ्यनीगु खँ काठमाडौं उपत्यका खानेपानी लिमिटेडं धाःगु दु ।

लिमिटेडया प्रमुख कार्यकारी अधिकृत मिलन शाक्यया कथं थगुनेया अनुभव कथं हे येँय् लः इनेगु ज्या जुइ । अबलय् गन गन लः मथ्यंगु खः उकिया कारण मालाः इनेगु ज्या जुइ ।

थौंकन्हय् आपालं थासय् न्हूगु पाइप लायेगु ज्या क्वचायेधुंकूगु जूसां नं उकिया परीक्षण मजूनिगु कारणं आःयात पुलांगु पाइपं हे लः इनीगु खँ धाःगु दु । न्हूगु पाइप लाइनया परीक्षण नं नापनापं हे जुइगु खँ नं वय्कलं कनादिल । मेलम्चीपाखें १७ करोड लः हयेगु तयारी जुयाच्वंगु खःसां आः तत्कालया नितिं धाःसा म्हो जक लः हयेगु खँ वय्कलं कनादीगु दु ।

वंगु असारय् वःगु खुसिबाः व चलखं यानाः मेलम्ची आयोजनाय् क्षति जूगु खःसा वयां लिपा येँय् लः छ्वयाहयेगु ज्या बन्द जूगु खः ।