आकिवं तक ५ करोड सिमा पी फइ ला ?

येँ – देशय् हरियाली कायम यायेगु ताः तयाः सरकारं आकिवं तकया दुने देय्न्यंकं ५ करोडमा सिमा पीगु राष्ट्रिय कार्यक्रम घोषणा याःगु दु । तर नेपाःया वन व वनस्पतिविज्ञतय्सं धाःसा आकिवं तक नेपालय् ५ करोडमा सिमाया पुसा (विरुवा) हे उत्पादन यायेगु क्षमता मदुगु जुयाः थ्व राष्ट्रिय कार्यक्रम गय् यानाः सफल जुइ धकाः न्ह्यसः तया हःगु दु ।

कृषि मन्त्रालय सूत्रं धाः कथं आकिवं तकया दुने मन्त्रालयपाखें २ करोडमा तक सिमा (विरुवा) उत्पादन याये फइ । अथे हे नेपालय् च्वंगु फुक्क हे सामुदायिक वनत मिले जुल धाःसा मेगु छगूत्या करोडमा तक सिमाया पुसा उत्पादन याये फइ । बाँकी पुसा देय्न्यंकं च्वंगु थीथी नर्सरीपाखें काये माली धाःगु दु ।

तर नर्सरीतय्के अथे लाखौं लाख सिमाया पुसा उत्पादन यायेगु क्षमता धाःसा मदु । आकिवं तकया दुने ५ करोडमा सिमा पीगु राष्ट्रिय कार्यक्रम सञ्चालन यायेत सरकारं पुसा जक न्यायेगु लागिं ६० करोड तकाया बजेट फ्याःगु दु । तर ध्यबा दुसां सिमाया पुसा हे मदइगु जुयाः थ्व कार्यक्रम ताःलाइगु खँय् शंका याना हःगु दु ।

वंगु निवाः न्ह्यः वातावरण दिवस कुन्हु प्रधानमन्त्रीया हे नेतृत्वय् राष्ट्रिय अभियानया रुपय् देय्न्यंकं सिमा पीगु ज्या जूबलय् उकी २० लाखमा जक सिमा पी फुगु खः ।

 

सम्बन्धित बुखँ

LEAVE YOUR COMMENTS