गय् यानाः लुटे यात एटीएमं ध्यबा ?

येँ – वंगु शनिवाः चिनियाँ ह्याकरतय्गु पुचलं नेपाःया थीथी बैंकया एटीएमपाखें ध्यबा अनधिकृत कथं ध्यबा लिकयाः याःगु लुट बारे अनुसन्धान न्ह्याकाच्वंसां थुकिया बारे सिउपिं विज्ञत मवःगुलिं थाकुयाच्वंगु खँ धाःगु दु । नापं ह्याकरत चिनियाँ नागरिक जूगुलिं उमिसं नेपाली वा अंग्रेजी भाय् मथूगु व प्रहरीइ चिनियाँ भाय् सःपिं मनू मदयाः नं समस्या जुयाच्वंगु खँ धाःगु दु ।

ह्याकरतय् थ्व लुटया कारणं देय्या सकलें बैंकत थारान्हुयाच्वंगु दु । ह्याक जुइवं एटीएम बन्द याःपिं छुं बैंकतय्सं जोखिम कयाः जूसां एटीएम सेवा हानं शुरु याःगु दुसा गुलिखे बैंकतय्सं धाःसा अझं शुरु याःगु मदुनि ।नेपाल प्रहरीं थ्व बैंकतय्त एटीएम मेशिन उपलब्ध याःगु नेप्स धाःगु संस्थाया मनूतय्त सःताः ह्याकरतय्सं गय् यानाः लुटे याःगु जुइ धकाः न्यनेकने यानाच्वंगु दु ।

नेप्सपाखें नं थ्व बारे सिउपिं विज्ञत सःतूगु दु ।सुं नं मनुखं एटीएम मेशिनय् कार्ड दुछ्वयाः ध्यबा माग यायेवं मेशिनं तुरुन्त प्यंगू मेगु निकायय् सूचना प्रवाह यानाः ध्यबा बिउसां जिउगु खः वा मखु बुझे याइ । एटीएम मेशिनयात प्यंगुुलिं निकायं ध्यबा बिउसां जिउ धइगु लिसः वयेवं वयां लिपा जक मेशिनं ध्यबा कुर्केगु शुरु याइ ।

तर चिनियाँ ह्याकरतय्सं अज्याःगु प्यंगू निकाय मध्ये निगू निकाय तक सूचना हे मछ्वसे ‘ध्यबा बिउसां जिउ’ धइगु लिसः वयेकीगु शफ्ट वेयर प्रयोग यानाः थ्व ध्यबा लिकाःगु खँ धाःगु दु । थथे यायेगु लागिं उमिके बैंकया सकलें निक्षेपकर्तातय्गु जानकारी दयेमाः ।

थ्व जानकारी उमिके गनं वन धइगु न्ह्यसः पिहां वःगु दु । थ्व जानकारी गनं बैंकया कर्मचारीतय्संं हे जकं बिल लाकि धइगु आशंका जुयाच्वंगु दु । यदि सकलें सूचना उमिके दुगु जुल धाःसा उमिसं हानं हानं थथे हे यानाः लुटे याये फइगु खँ धाःगु दु ।

सम्बन्धित बुखँ

LEAVE YOUR COMMENTS