थिमि बम निष्क्रिय, कपिलवस्तुइ बसय् बम कयेकल

ख्वप– थिमिया प्यंगू दुवातय् तयातःगु बम नेपाली सेनां निष्क्रिय याःगु दु । थौं न्हिनय् ३ बजे साझा पेट्रोल पम्प लिक्कसं सिमा क्वय् तयातःगु झोलाय् बम तयातःगु लूगु खँ महानगरीय प्रहरी वृत्ति थिमिया डिएसपी प्रज्वल महर्जनं धयादीगु दु ।

बम तयातःगु लुइवं कोटेश्वर–ख्वपया ६ लेनया सडक बन्द यानाः बम निष्क्रिय याःगु खः । सेनाया न्हापांगु टोली बम निष्क्रिय यायेमफयेवं मेगु पुचः वयाः बम निष्क्रिय याःगु खँ धाःगु दु ।

थौं हे तिनकुनेया बागमति ताँय् सेनां निष्क्रिय याःगु शंकास्पद वस्तु धाःसा बम मजूगु खँ धाःगु दु । थन नं शंकास्पद वस्तु तयातःगु लुइवं सेनाया बम डिस्पोजल टोली हयाः निष्क्रिय याःगु खः । तर थन तयातःगु शंकास्पद धाःगु वस्तु बम मखसे होक्स जक जूगु खँ महानगरीय प्रहरी परिसरया प्रमुख एसएसपी विश्वराज पोखरेलं धयादीगु दु । वय्कलं बन्दया झ्वलय् सर्वसाधारणयात आतंकित यायेत जक शंकास्पद थें च्वंक वांछ्वयातःगु खँ धयादीगु दु ।

मेखे कपिलवस्तुइ धाःसा छगः चले जुयाच्वंगु गाडीइ हे बम कयेकूबलय् झिंनिम्ह घाःपाः जूगु दु । येँ नं दाङपाखे वनाच्वंगु ना ६ ख ७९१० नम्बरया गाडीइ मंगलवाः न्हिनय् शिवराज नगरपालिकाया बेलनदी धाःथाय् थ्यंबलय् म्हसिउपिनि पुचलं पेट्रोल बम कयेकूगु खः । घाःपाः जूपिं स्वम्हेसित थप उपचारया निंतिं बुटवल छ्वःगु व मेपिंत स्थानीय सामुदायिक अस्पतालय् वासः याकूगु खँ धाःगु दु ।