असं क्वथुननिइ धर्मदेशना

येँ – थनया असं क्वथुननिइ च्वंगु अशोकवृक्ष विहारय् पञ्जरांया लसताय् धर्मदेशना ज्याझ्वः जुल । गुथि संस्थानं विहार थुनाः व्यापारिक भवन दयेकेत स्वया च्वंगु धासें लिपांगु इलय् चर्चाय् वयाच्वंगु कोथुननिइ पञ्जरांकुन्हु धर्मदेशना ज्याझ्वः जूगु खः ।

लुम्बिनी विकास कोषया पुलांम्ह उपाध्यक्ष भिक्षु निग्रोधं दानया महत्व व धर्मया बारे धर्मदेशना बियाबिज्याःगु खः । धर्मदेशना बिया बिज्यायेगु झ्वलय् वसपोलं बौद्ध धर्मय् दान यायेगु व धर्म यायेगु छुं नं कथंया लाभ व लोभ मयासे यायेगु कर्मकथंया ज्या खः धयाबिज्यात ।

झी पुर्खां ल्यंका थकूगु सम्पदायात झीसं नं संरक्षण याना तयेमाः धासें धार्मिकस्थल, सम्पदा, धरोहर व स्मारकया संरक्षण यानाः उकियात लिपाथ्यंकं ल्यंका तयेगु नं धर्मया हे ज्या खः धयाबिज्यासें अशोकवृक्ष विहार सम्राट अशोकया पालय् हे निर्माण जूगु खयेमाः धयाबिज्यात ।

वसपोलं क्थुननिया ऐतिहासिक अशोक वृक्ष विहार थेंज्याःगु सम्पदायात ल्यंका तयेगु निंतिं गुकथं कुतः जुयाच्वंगु खः उकियात कयाः नं च्वछानाबिज्यात । गुथि संस्थानं
क्वथुननिया थुगु विहार थुनाः व्यापारिक भवन दयेकेत स्वयाच्वंगु धासें थुकिया संरक्षणया निंतिं अभियान न्ह्यानाच्वंगु दु ।