ने. सं. ११४६ बछलागा चौथी -

देगः दुनी धकाः तग्वःगं थायेगु बन्द

येँ – येँया हनुमानध्वाखा दरवार लागाय् च्वंगु ऐतिहासिक गं थायेगु बन्द जूगु दँ दँ हे दत । २०७२ सालया तःभुखाय् लिपांनिसें थ्व गं थायेगु बन्द जुयाच्वंगु दु । गं थायेगु बन्द जूगुया कारण धाःसा गं स्यनाः वा थाइपिं मनूत मदयाः मखु ।

थ्व गंया नापसं च्वंगु महाद्यः पार्वती देगः भुखाचं क्षतिग्रस्त जूगु जुयाः गं थात धाःसा उकिया कम्पनं देगःयात लिच्वः लाकी धकाः गं थायेगु बन्द जूगु खँ गं थायेगु ज्या यानादीम्ह भाजु बालकृष्ण महर्जनं ‘नेपालभाषा टाइम्स’ यात कनादिल ।

गं थाइबलय् उकिया कम्पनं देगःयात लिच्वः लाकी धकाः अन हे च्वंपिं छुं स्थानीय मनूतय्सं पं वःगु जुयाः थम्हं गं थायेगु मयानाच्वनागु खँ भाजु महर्जनं कनादिल । तर गं थाइबलय् देगःयात प्रभावित याइ वा मयाइ धइगु खँय् धाःसा आः तक छुं नं कथंया परीक्षण मजूगु खँ नं वय्कलं कनादिल ।

न्हिंन्हिं सुथय् ९ बजेपाखे हनुमानध्वाखाय् च्वंगु देगु तलेजु द्यःयाथाय् नित्य पुजा जुइबलय् पिने थ्व गं थायेमाःगु चलन दु । थ्व गं न्हिं १०८ क्वः थाइगु खः । थ्व गं थायेगु शुरु जुल कि नापसं च्वंगु तग्वःगु नगडा नं थायेगु शुरु जुइ । गं मथायेकं नगडा जक थायेगु चलन मदु । हनुमानध्वाखाया तग्वःगं थायेगु जिम्मा बालकृष्ण महर्जन व कान्छा महर्जन यानाः निम्हेसित बियातःगु खः ।

गं थायेगु बन्द जूसां न्हिंन्हिं पुजा तयाः तग्वःगंयात पुजा धाःसा नियमित रुपं यानाच्वनागु खँ महर्जनं कनादी । थ्व ज्याया लागिं वय्कःपिं लय न्याद्वः तका पारिश्रमिक बियातःगु दु । वय्कःपिं लछि तक पालंपाः गं थायेगु यानादी । नापसं च्वंगु महाद्यः–पार्वती देगः दुना वइ धकाः तग्वःगं थायेगु सांस्कृतिक ज्या बन्द यानातःसां थ्व महाद्यः–पार्वती देगः जीर्णोद्धार यायेगु बारे धाःसा सरकारं आः तक छुं हे चिउताः तःगु मदुनि ।

थ्व देगः पुरातत्व विभाग अन्तर्गत लाः । तर विभागं देगः दनेगु बारे वास्ता मयाः । येँ महानगरपालिकां थ्व देगः थःपिंसं दना बी धकाः प्रस्ताव तलं नं पुरातत्वं अनुमति मबिउगु खँ येँ मनपाया मेयर विद्यासुन्दर शाक्यं सार्वजनिक रुपं हे कनादी धुंकूगु दु । देगः जीर्णोद्धार मजुयाः मेखे तग्वःगं थायेगु ज्या नापं दिनाच्वंगु दु ।