थिमिया स्वदँ पुलांगु महाकाली प्याखं
वंगु नीन्यादँ न्ह्यवंनिसें बन्द जुयाः मध्यपुर थिमि वडा नं. ५ व ६ या ल्याय्म्हतय् सक्रियताय् थगुनेनिसें संचालनय् वःगु स्वसः दँ पुलांगु महाकाली प्याखं क्वचाःगु दु । थुगुसी येँयाःया कन्हय्कुन्हु अर्थात येँयाःपुन्हि मंगलवाःकुन्हु बहनिनिसें शुरु जुयाः गुरुपिनिगु त्वालय् प्रदर्शन यानाः प्याखं क्वचायेकूगु खः ।
महाकाली नाच संरक्षण तथा संचालन समितिं संचालनय् हःगु प्याखं मध्यपुर थिमि–५ भुलांख्यलय् च्वंगु नासःद्यःया थासं शुरु जुयाः बहनिपतिकं त्वाःत्वालय् वनाः प्याखं क्यनेज्या जूगु खः ।समितिया अध्यक्ष सूर्यमान पिला श्रेष्ठं धयादिल, ‘पुन्हिकुन्हुनिसें बहनि बहनि संचालन जूगु थ्व प्याखं दँय्दसं संचालनय् हयेगु जुइ, थ्व प्याखं न्हियान्हिथं बहनिसिया खुताः ई लिपा नासःद्यःयात समर्पण यासें थिमिया त्वाः त्वालय्, चुकय् चुकय् हुइकूगु खः ।’
प्याखं दथु त्वाः, दिगु त्वाः, गंगछिपा त्वाः चपाच्व, पोबु त्वाः, भुलां ख्यः, वाःननि जुयाः थिमिया थीथी त्वालय् चाःहिकाः बालकुमारिइ थ्यंकूगु खः ।प्याखंया गुरु हरिबहादुर कैति श्रेष्ठं आदिमकालंनिसें हे देवासुर संग्रामय् आधारित जुयाः असुसर जातियात पराजित यायेधुंकाः विजयोत्सवया रुपय् थ्व प्याखं गुंगूनिसें झिंस्वंगू तालय् प्याखं हुली धयादिल ।
आदिमकालंनिसें हे देवासुर संग्रामय् आधारित जुयाः असुसर जातियात पराजित यायेधुंकाः विजयोत्सवया रुपय् थ्व प्याखं गुंगूनिसें झिंस्वंगू तालय् हुली
वय्कः थः हे नं २०२५ सालय् देवी जुयाः प्याखं हुलागु लंमंकादिसें थम्हं प्याखं सयेका तयागुलिं थ्व प्याखं ल्यंकेत अःपुगु धयादिल ।
थ्व प्याखनय् हुइकीगु ताल दकलय् पुलांगु व मेगु प्याखंया ताललिसें तुलना नं याये मिले मजू । प्याखय् देवी छम्ह, महालक्ष्मी छम्ह, बेताः प्यम्ह, भूत भैरव निम्ह, सिंह छम्ह, कवं निम्ह, ख्याः निम्ह व माकः निम्ह यानाः झिंन्याम्हेसिनं थीथी देवीदेवताया रुपय् प्याखं हुलीगु वय्कलं धयादिल ।
बाजंया ताललिसें थीथी स्वरुपय् हुलीगु थ्व प्याखनय् देवी व दानवया युद्धयात तकं चित्रण यानातःगु धासें गुरु श्रेष्ठं लगातार झिंस्वंगू तालय् प्याखं हुलेबलय् चछि ई बीगुलिं दक्वं त्वालय् दक्वं तालय् प्याखं मफइगु जानकारी बियादिल ।
परापूर्वकालय् थ्व प्याखं हुइकीबलय् थाइगु बाजंया सः व देवीदेवताया स्वरुपं भूत बिसिउँ वनी धइगु जनविश्वास दुगु धासें मेम्ह गुरु हिराकाजी लामा श्रेष्ठं द्यःया रुपय् प्याखं हुलीपिंके देवीया शक्ति वइगु जूगुलिं लगातार प्याखं हुइ मफइगु खः धयादिल । समितिया अध्यक्ष श्रेष्ठं थुगुसी प्याखंया निंतिं आवश्यक मतू, तिसा, वसः नापं सामग्री न्यानागु व प्याखय् करिब च्यागू लाख तका खर्च लगे जूगु धयादिल ।
LEAVE YOUR COMMENTS