कात्तिप्याखं निन्हु जक क्यनीगु

यल (नेपालभाषा टाइम्स) – थुगुसी कात्तिप्याखं निन्हु जक क्यनीगु जूगु दु। वइगु शुक्रवाः व शनिवाः (मंसिर १२ व १३) गते निन्हु जक कात्तिप्याखंया मू ब्व बराह अवतार व नृसिंह अवतार जक न्ह्यब्वयेत्यंगु खः ।

कोरोना भाइरसया महामारीया कारणं परम्परा जक ल्यंकेगु निंतिं जूसां निन्हु जक कात्तिप्याखं न्ह्यब्वयेत्यंगु खः । थ्वयां न्ह्यः थ्व प्याखं झिंनिन्हु तक क्यनेगु यायेधुंकूगु खः । जुजु योगनरेन्द्रदेवया पालय् धाःसा थ्व प्याखं कात्तिक महिनाया २७ न्हु तक हे क्यनेगु यायेधुंकूगु खः । कात्तिक नाच संरक्षण समितिया अध्यक्ष किरण चित्रकारं वइगु शुक्रवाः बराह व शनिवाः नृसिंह अवतार क्यनेगु तयारी जुयाच्वंगु खँ कनादीगु दु। वय्कलं थुकिया निंतिं यल महानगरपालिकायालिसे नं सहलह जुइधुंकूगु खँ धयादीगु दु । कोरोना महामारीया कारणं सामाजिक दूरी कायम यानाः आवश्यक कलाकार बाहेक मेपिंत मतसे निन्हु जकसां प्याखं न्ह्यब्वयेगु खँ वय्कलं कनादीगु खः ।

थ्व प्याखं सुरु जुसांनिसें आःतक गबलें हे मदिकूनिगु इतिहास दु । वि.सं. १६९७ य् यलया जुजु सिद्धिनरसिंह मल्लं देय् व जनताया कल्याणया निंतिं कात्तिप्याखं सुरु याःगु खः । सुरुइ न्यान्हु जक क्यनेगु याःगु थ्व प्याखं श्रीनिवास मल्लया पालाय् बाथः प्याखं, सुदामा प्याखं, सुरदास प्याखं थप यानाः झिंन्यान्हु क्यनेगु याःगु इतिहास दुसा श्रीनिवासया काय योगनरेन्द्र मल्लं उषाहरण व माधवानल निगू नाटक थप यानाः २७ न्हु तक संचालन याःगु खः ।