अफगानिस्तानया पञ्जशीरय् तालिबान व विद्रोही एनआरएफया दथुइ युद्ध

एजेन्सी( तालिबानं कब्जाय् कायेमफुगु अफगानिस्तानया पञ्जशीर प्रान्तय् तालिबान व विद्रोही पुचः नेशनल रेसिन्टेन्स फ्रन्ट (एनआरएफ)या दथुइ युद्ध जुयाच्वंगु दु । तालिबानं पञ्जशीर प्रान्तया छुं छुं भाग थःपिंसं नियन्त्रणय् कयागु व एनआरएफयात यक्व हे क्षति यानाबियागु धाःगु खःसां एनआरएफं पञ्जशीरया दक्वं प्रवेशद्वार थःपिनिगु नियन्त्रणय् दुगु व युद्धय् तालिबानया सलंसः लडाकु सीगु दाबी याःगु दु ।

एनआरएफय् अफगानिस्तानया पूर्व सैनिक व स्थानीय लडाकुत दु । थुकिया नेतृत्व स्थानीय नेता अहमद मासुदं यानाच्वंगु दु । अफगानिस्तानया पूर्व उपराष्ट्रपति अमरुल्लाह सालेह नं थ्व पुचलय् दु ।
तालिबान व पञ्जशीरय् दुपिं एनआरएफया नेतात दथुइ जूगु वार्ता असफल जूगु खः ।

निगुलिं पक्ष फरक फरक अडान कयाच्वनेवं वार्ता असफल जूगु बिबिसीं जानकारी बिउगु दु । अन्तर्राष्ट्रिय सञ्चार माध्यमया कथं पञ्जशीरय् जुयाच्वंगु युद्धय् ३५० सिबें अप्वः तालिबानत सीधुंकूगु दु । निगुलिं पक्षं थुकिया पुष्टि याःगु मदुनि ।