ने. सं. ११४४ कौलाथ्व तृतीया -

काउन्सिलं ज्वःलाःगु डोमेनया न्यूजपोर्टल सूचीकरण मयाइगु

येँ- पे्रस काउन्सिल नेपालं ज्वःलाःगु डोमेनया न्यूजपोर्टल सूचीकरण मयाइगु जूगु दु । काउन्सिलं छगू विज्ञप्ती जारी यासें डोमेन ज्वःलाःगु अनलाइन न्यूजपोर्टल सूचीकरण मयायेगु स्पष्ट याःगु खः ।

अनलाइन संचारमाध्यम संचालन निर्देशिका–२०७३ (न्हापांगु संशोधन, २०७४)य् अनलाइन संचारमाध्यम सूचना व प्रशारण विभागय् दर्ता जुइमाःगु व्यवस्था यानातःगु दु । पत्रकार आचारसंहिता पालना सम्बन्धय् अनुगमनलिसें निरीक्षण व अभिलेखीकरणया निंतिं नेपाल पे्रस काउन्सिलं सूचीकरण यायेगु याना वयाच्वंगु दु ।

थ्व झ्वलय् काउन्सिलय् आतक २,८३० गू अनलाइन सूचीकरण जुयाच्वंगु काउन्सिलया विज्ञप्तीइ धयातःगु दु । काउन्सिलयाकथं दर्ता जुयाः सूचीकरणया निंतिं वइगु अनलाइनतय्सं अप्वःथें मिले जूगु वा ज्वःलाःगु नां व दर्ता जुयाः संचालन जुयाच्वंगु नां चले जूगु अनलाइन लगायत संचारयात आधार दयेकाः न्ह्यःने वा लिउने गुगुं नं अंक व आखः स्वाकाः डोमेन व मिडिया दर्ता याकाः सूचीकरणया निंतिं आवेदन बीगु प्रवृत्ति अप्वयाच्वंगु दु ।

थुकथंया विषयय् न्हापा हे विधिवत रुपं दर्ता जुयाः संचालन जुयाच्वंगु अनलाइन संचारमाध्यमपाखें तःक्वः हे उजुरी व गुनासोत नं वयाच्वंगु धासें थ्व सम्बन्धय् वंगु साउन १८ गते च्वंगु आचारसंहिता अनुगमन उपसमितिया मुँज्यां डोमेन दर्ता, मिडिया दर्ता याकाः ज्वःलाःगु मास्कहेड, लागो, नां तयाः सूचीकरण यायेत वल धाःसा अज्याःगु न्यूज पोर्टलयात सूचीकरण मयायेगु निर्णय याःगु काउन्सिलं स्पष्ट याःगु दु ।