आलु प्याजया भ्याट विरुद्ध आन्दोलन
येँ (नेपालभाषा टाइम्स)- सरकारं आलु प्याज आयातय् भ्याट लागू यायेवं कालिमाटी तरकारी बजाःया व्यापारीतय्सं विरोध याःगु दु । नेपाल कृषिउपज आलु प्याज आयात निर्यात थोक बिक्री संघं म्हिगः पत्रकार सम्मेलन यासें भ्याट काःगुलिं विरोध याःगु खः ।
व्यापारीतय्सं आलु प्याजय् भ्याट लगे यानाः अर्थमन्त्री प्रकाशरण महतं आत्मघाती पलाः ल्ह्वंगु द्वपं बिउगु दु । पत्रकार सम्मेलनय् न्ववासें संघया अध्यक्ष मोहन बानियाँ धयादिल,
‘आयातया विवरणया अंक जक स्वयाः अध्ययन मयासे भ्याटया व्यवस्था याःगु धइगु अर्थमन्त्रीया आत्मघाती निर्णय खः । थज्याःगु व्यवस्थां व्यवसायीं आलु प्याज आयात याये फइ मखु, उपभोक्तां बजारय् आलु प्याज न्याये मफइगु अवस्था ब्वलंगु दु ।’
आलु प्याज व्यवसायय् परम्परागत रुपय् व्यक्तिगत लेखा नम्बरय् आधारित जुयाः कारोबार यानाच्वंपिंत छक्वलं भ्याटया प्रावधानं आयातय् समस्या ब्वलनीगु खँ नं बानियाँ धयादिल ।
थौंकन्हय् बजारय् प्याजया अभाव जुयाः किलों सछि तका थ्यनाच्वंगु दु । वंगु छवाः न्ह्यः तक न्यय्तकां न्यायेदुगु खःसा आः बजारय् प्याज अभाव जुयाः भाः थहां वंगु खः ।
थ्वहे झ्वलय् कालिमाटीया तरकारी बजारय् च्वंपिं व्यापारीतय्सं भारतं आयात यानाच्वंगु आलु प्याज आयात बन्द याःगु दु ।
कालिमाटी तरकारी बजाःया पुलांम्ह अध्यक्ष नविन शाहीं ‘नेपालभाषा टाइम्स’ लिसे खँ ल्हायेगु झ्वलय् सरकारं आलु प्याजय् भ्याट लागू यायेवं व्यवसायीयात स्वयां नं उपभोक्तायात मर्काय् लाकीगु बिचाः प्वंकादिल ।
वय्कलं थौंकन्हय् आलु प्याजुया आयात ठप्प जुयाच्वंगु खँ कँसें धयादिल, ‘सरकारं भ्याट लगे यायेवं व्यवसायीयात समस्या जुइ मखु, व्यवसायीं ला उपभोक्तापाखें भ्याट कयाः सरकारयात पुलीगु खः ।’
LEAVE YOUR COMMENTS