चिनियाँ खोप थ्यन तर बी मछिंनि

येँ – चीनं ग्वाहालि कथं बिउगु कोरोना विरुद्धया खोप म्हिगः येँय् थ्यन । नेपाल वायुसेवा निगमया वाइडबडी ३३० जहाजं थ्व खोप येँय् थ्यंके हःगु खः । उगु खोप म्हिगः हे स्वास्थ्यमन्त्री हृदयेश त्रिपाठीयात नेपाःया निंतिं चिनियाँ राजदूत होउ यान्छिं लःल्हानादिल । त्रिभुवन विमानस्थलय् स्वास्थ्य मन्त्रीयात लःल्हाये धुंकाः हाकनं बालुवाटारय् प्रधानमन्त्री केपी ओलीयात नं राजदूत यान्छी खोप लःल्हानादीगु खः ।

चिनियाँ सरकारं चीनय् उत्पादन जूगु ‘भेरोसेल’ नांया खोप च्यागू लाख डोज ग्वाहालि कथं बिउगु खः । चीनया सिनोभ्याक बायोटेकं उत्पादन याःगु थ्व खोप नं निगू मात्रा बीमाः ।
थ्व खोप नेपालय् थौंकन्हय् बिया वयाच्वंगु कोभि– शिल्ड खोप स्वयां प्रभावकारी व थिके नं जूगु खँ स्वास्थ्य अधिकारीतय्सं धाःगु दु ।

नेपालय् खोप थ्यंकः वःसां थ्व तुरुन्त हे धाःसा बी मखुनि । नेपालं थ्व खोपयात आकस्मिक रुपं बीगु निंतिं स्वीकृति बिया तयेधुंकूगु दु, तर विश्व स्वास्थ्य संगठनं थ्व खोपयात स्वीकृति मबिउनि । विश्व स्वास्थ्य संगठनं स्वीकृति बीधुंकाः जक नेपालय् नं थ्व खोप बी । राष्ट्रिय खोप सल्लाहकार समितिं नं विश्व स्वास्थ्य संगठनया निर्णय लिपा जक थ्व खोप बीत सुझाव बिउगु दु ।

सरकारं थ्व खोप सुयात बीगु धयागु नं निर्णय याःगु मदुनि । स्वास्थ्य सेवा विभाग अन्तर्गतया बाल स्वास्थ्य तथा खोप शाखाया प्रमुख डा. झलक शर्मा गौतमं सरकारं याकनं हे थ्व खोप सुयात सुयात बीगु धयागु निर्णय याइगु खँ धयादीगु दु ।

सम्बन्धित बुखँ

LEAVE YOUR COMMENTS