
येँ – स्वनिगःया नेवाःतय्त आक्रोशित याये कथं सरकारं हःगु गुथि विधेयक लित कायेधुंकाः आः नेवाःतय्सं थःपिनि बिस्कं अवधारणा तयार यायेत सहलह ब्याकूगु दु । तर सरकारयात बीगु लागिं थःपिनि बिस्कं अवधारणा दयेकूसां सरकार विरुद्ध न्ह्यानाच्वंगु खबरदारी आन्दोलन धाःसा मदीगु खँ धाःगु दु ।
नेवाःतय्सं न्ह्याकीगु आन्दोलनयात समर्थन व्यक्त यासें शुक्रवाः मरुया महाद्यः–पार्वती दबू क्वय् ऐक्यवद्धता सभा याःगु खः । ज्याझ्वलय् आदिवासी जनजाति महासंघ लगायत थीथी जातीय खलः पुचःया प्रतिनिधितय्सं सम्बोधन याःगु खः । थ्वहे झ्वलय् आः गुथि विधेयकयात कयाः न्ह्यानाच्वंगु आन्दोलनयात अझ व्यवस्थित यायेगु लागिं सांगठनिक स्वरुप तयार यायेगु बारे नं सहलह जुयाच्वंगु खँ सीदुगु दु ।
आन्दोलनयात आः छु गज्याःगु मोडलया संगठन दयेकाः न्ह्याकल धाःसा गति काइ धइगु खँय् आन्दोलनकारी व्यक्तित्वतय् दथुइ सहलह जुयाच्वंगु खँ सीदुगु दु । गुथि सञ्चालन बारे अवधारणा दयेकेगु लागिं थीथी जातीय संगठन, थीथी गुथिया गुथ्याः लिसें कानूनविद् समेत तयाः सहलह याकेगु लागिं नं तयारी जुयाच्वंगु दु । थुकिया लागिं गुथितय्गु सम्मेलन सःतेगु नं खँ जुयाच्वंगु दु ।
LEAVE YOUR COMMENTS