न्हापांम्ह मिसा धिमय् वादकया जीवनीइ संकिपा
ख्वप(नेपालभाषा टाइम्स)÷ नेपाःया न्हापांम्ह मिसा धिमे वादक इन्दिरा लाछिमस्यूया जीवनीया लिधंसाय् संकिपा निर्माण याइगु जूगु दु । नेपालभाषाया हे दकलय् न्हापांगु बायोपिक संकिपाकथं कयातःगु ‘इन्दिरा धिमे मैंचा’ संकिपाया शुभमुहूर्त वंगु वालय् कमल विनायक बैंक्वेटय् जूगु खः ।
बि. के. फिल्मसया निंतिं गोपालकाजी कायस्थं निर्माण यानादीत्यंगु संकिपाया निर्माता सुरेन्द्र शाक्य खःसा सह निर्माता प्रकाशदीप श्रेष्ठ, गंगादेवी मानन्धर, सरिना वज्राचार्य, रजना जोशी व प्रविण भाम खः ।
थनिंनिसें शुटिङ न्ह्याःगु संकिपाया च्वमि व निर्देशक सुरेन्द्र तुलाधर खःसा मुख्य सहायक निर्देशक भोगेन्द्र मानन्धर खः । सिताराम माकःया व्यवस्थापन यानादीत्यंगु संकिपाया छाँयाकन सोहन मानन्धरं यानादीगु जूगु दु ।
रोजिना सुवालया मुख्य भूमिका दइगु संकिपाय् गणेशराम लाछि, आशाकाजी थकू, नगिना जोशी, देवचन्द्र वज्राचार्य, रुपेन श्रेष्ठ ‘थक्वाःमि’, रामराजा भाम लगायतया कलाकारं अभिनय यानादी ।
संकिपाया शुभमुहूर्त ज्याझ्वलय् मूपाहांकथं झायादीम्ह ख्वप नगरपालिकाया प्रमुख सुुनिल प्रजापति, चलचित्र संघया निवर्तमान नायः मधुसुदन प्रधान, सिने पत्रकार विजयरत्न असंबरे, इतिहास व संस्कृतिविद पुरुषोत्तमलोचन श्रेष्ठ लगायतं संकिपाया थीथी पक्षयात कयाः नुगःखँ तयादीगु खः ।
LEAVE YOUR COMMENTS