गुंलाधर्म केन्द्रित आन्दोलन
नेवाः सांस्कृतिक क्षेत्र घोषणा याकेत विशेष अभियात
येँ – नेवाः सांस्कृतिक स्वायत्त लागा घोषणा याकेगु आन्दोलन न्ह्याकेगु लागिं आन्दोलनकारीतय्सं नेवाःतय् सांस्कृतिक पर्व गुंलायात लक्षित याःगु दु । थुकिया लागिं थौं शुक्रवाःनिसें शुरु जुइगु गुंला पर्वयात ध्यानय् तयाः मनूत मुनीगु थासय् प्रचारात्मक आन्दोलन यायेगु ज्याझ्वः पित हःगु दु ।
थ्व झ्वलय् गुरुजुपिनिगु नेतृत्वय् गुंला लछियंकं न्हिंन्हिं सुथय् ६ः३० बजेनिसें नेवाः एकता, नेपालमण्डल व नेवाः सांस्कृतिक स्वायत्त क्षेत्रया निंतिं गं थायेगु ज्याझ्वः दयेकूगु दु । न्हिंन्हिं सुथय् सकल नेवाःतय्त संकट मोचनया निंतिं गं थायेगु ज्या जुइ ।छखे गं थानाच्वनीगु इलय् मेखे हारतिमांया थाय् पुजा बीगु ज्या न्ह्यानाच्वनी ।
हारती मांयात पुजा यानाच्वंगु हे इलय् सकलें जानाः स्वयम्भूइ नेवाः एकता, नेवाः सांस्कृतिक स्वायत्त क्षेत्रया माग यानाः नाराबाजी नं जुइ ।
अथे हे न्हिंन्हिं गुरुजुपिंसं तुतः ब्वनीगु इलय् नं नेवाः अधिकार, नेपाल– मण्डल, नेवाः सांस्कृतिक स्वायत्त क्षेत्रया खँ दुथ्याकाः पाठ यायेगु ज्याझ्वः दयेकूगु दु ।
अथे हे थेरवादी भन्तेपिंपाखें नं नेवाः अधिकार, नेपालमण्डल, नेवाः सांस्कृतिक स्वायत्त क्षेत्रया खँ धर्म देशनाय् दुथ्याकाः कनेगु ज्याझ्वः दयेकूगु दु ।हारति द्यःमांथाय् नं नेवाः अधिकार, नेपालमण्डल, नेवाः सांस्कृतिक स्वायत्त क्षेत्रया खँ दुथ्याकाः पाठ याकेगु ज्याझ्वः दु ।
शनिवाःपतिकं थाय्थासय् च्वंगु खलःपुचःत जानाः नारा थ्वयेका स्वयम्भू चाःहिलाः भुइख्यलय् वयाः कोणसभा यायेगु ।
न्हियान्हिथं गुंलाबाजं थानाः वइगु इलय् नेवाः एकता, नेवाः स्वायत्त सांस्कृतिक क्षेत्र लगायतया नारा नं च्वयाः बाजनय् तिका यंकेत इनाप याःगु दु ।
स्वयम्भू वनीपिं सकस्यां न्हिंन्हिं
‘झीगु सभ्यता म्वाकेनु, नेवाः सांस्कृतिक स्वायत्त अभियान’ धकाः च्वयातःगु टि सर्ट फिनाः चाःहिलेगु नं ग्वसाः याःगु दु ।गुंलाया अन्तिम शनिवाः नेवाः सांस्कृतिक स्वायत्तताया माग यासें नारा थ्वयेकाः बसन्तपुली सभा यायेगु ज्याझ्वः दु ।
स्वनिगःयात नेवाः स्वायत्त सांस्कृतिक क्षेत्र घोषणा या, स्वनिगःया स्थानीय तहलय् स्थानीय पाठ्यक्रम लागू या, मांभासं शिक्षा बीगु व्यवस्था या, गुथि विधेयक खारेज या, गैर न्यायिक सतकविस्तार बन्द या, नेवाः संस्कृति सभ्यतायात यानाच्वंगु अतिक्रमण बन्दया धकाः नारा च्वयाः थाय् थासय् ब्यानर ब्वयेगु ज्या नं न्ह्याकेत्यंगु दु ।
LEAVE YOUR COMMENTS