निम्हं अध्यक्ष विदेशपाखे

येँ – सत्तारुढ दल नेपाल कम्युनिष्ट पार्टीया निम्हं अध्यक्षपिं विदेश यात्राय् वनीगु जूगु दु । निम्हं अध्यक्षपिं विदेश वनीगु जूगुलिं पार्टी दुने ब्वलनाच्वंगु विवाद समाधान यायेत जुयाच्वंगु बैठक नं वय्कःपिं लिहां मवःतले स्थगित जूवंगु दु । प्रधानमन्त्री समेत जुयादीम्ह पार्टी अध्यक्ष केपी शर्मा ओली थ्वहे साउन १८ गते सिंगापुर झाइगु जूगु दु ।

वय्कः १२ दँ न्ह्यः प्रत्यारोपण याःगु थःगु किड्नी जाँचया लागिं विदेश झायेत्यंगु खः । अथे हे मेम्ह अध्यक्ष पुष्पकमल दाहाल नं थः जहान सीता दाहालया वासः याकेगु झ्वलय् म्ह्याय् रेणु दाहाल व छय्पिं समेत ज्वनाः थौं हे दुबई वनीगु जुयाच्वंगु दु । निम्हं नेतात विदेश वनीगु जूगुलिं पार्टीया बैठक नं स्थगित यायेमाःगु अवस्था वःगु खँ सूत्रं धाःगु दु ।

पार्टीया स्कूल विभाग सुनां स्वइ धइगु निर्णय यायेत च्वनाच्वंगु सचिवालयया बैठक आः साउन २८ गते जक च्वनीगु खँ धाःगु दु ।
पार्टी स्कूल विभाग पूर्व एमाले ईश्वर पोखरेल व पूर्व माओवादी नारायणकाजी श्रेष्ठ मध्ये सुनां कायेगु धइगु निर्णय याये मफयाः बैठक ताःहाकः जुयाच्वंगु खः ।

सम्बन्धित बुखँ

LEAVE YOUR COMMENTS