ने. सं. ११४६ बछलागा पञ्चमी -

आकिवं सगरमाथाया न्हूगु उचाई

४० प्रतिशत क्वचाल सगरमाथाया जाः नापे यायेगु ज्या

येँ – नेपाः थःपिंसं हे यानाच्वंगु सगरमाथाया जाः (उचाई) नापे यायेगु ज्या आः तकया दुने ४० प्रतिशत क्वचाःगु खँ सीदुगु दु । सगरमाथाया जाः नापे यायेत नेपाःया नापी विभागं गठन यानातःगु समितिया नायः गणेशप्रसाद भट्टं कनादी कथं वि.सं २०७६ सालया मंसिर महिना तकया दुने सगरमाथाया न्हूगु उचाई सार्वजनिक जुइगु सम्भावना दु ।

वि.सं. २०७२ सालया तःभुखाय् लिपा सगरमाथाया उचाई थहां वंगु वा कुहां वःगु धइगु थीथी कथंया चर्चा वयाच्वंगु सन्दर्भय् नेपाःया नापी विभागं सगरमाथाया मापन हानं यायेगु निर्णय याःगु खः । सगरमाथाया न्हूगु उचाई नापे यायेत थौंकन्हय् सलंसः कर्मचारीत खटे जुयाच्वंगु दुसा उकी मध्ये ८० म्ह सर्भेयरत थीथी थासय् च्वनाः नापे यायेगु ज्या यानाच्वंगु दु ।

सगरमाथाया उचाई नापे यायेत सिरहाया मदार धाःगु थासं ज्या शुरु याःगु खःसा थौंकन्हय् सोलुखुम्बु लागाया थीथी झिगू थासय् च्वनाः मापन सम्बन्धी ज्या यानाच्वंगु दु । थ्व ज्याया लागिं करिब सछिगू थासय् गुरुत्वाकर्षण मापन समेत याये माःगु आवश्यकता दु । उकिया लागिं नेपाःयाके उपकरण तकं मदुगु जुयाः थ्व उपकरण न्यायेगु वा विदेशं अनुदानय् हयेगु ज्या जुयाच्वंगु खँ धाःगु दु ।

सगरमाथाया पूर्ण उचाई नापे यायेत सगरमाथाया च्वकाय् तकं थ्यंके माःगु आवश्यकता दु । उकिया लागिं थ्वहे वइगु समर सिजनय् नापी विभागया निम्ह सर्भेयरतय्त सगरमाथाया च्वकाय् छ्वयेगु तयारी जुयाच्वंगु दु । निम्ह च्वकाय् वनीबलय् मेपिं निम्ह क्वय् बेस क्याम्पय् च्वनाः ज्या यानाच्वंगु दु ।

निम्ह सर्भेयरतय्त च्वकाय् थ्यंकेगु लागिं शेर्पात ल्ययेगु ज्या जुयाच्वंगु दुसा थ्वहे वइगु फागुणंनिसें च्वकाय् वनीपिंत तालिम बीगु ज्या नं जुइगु खँ धाःगु दु । यदि थ्व समर सिजनय् सर्भेयरतय्सं याइगु आरोहण सफल जुयाः अन ज्या क्वचायेके फत धाःसा २०७६ या मंसिर तक सगरमाथाया न्हूगु उचाई पिकाये फइगु खँ भट्टं कनादीगु दु ।

आः तक जुयाच्वंगु ज्याखँपाखें सगरमाथाया उचाई घटे जुइगु वा बढे जुइगु छु जुइ धइगु खँ धाये मफइगु खँ नं वय्कलं कनादीगु दु । थ्व ज्याया लागिं विदेशी विज्ञतय्गु सल्लाह नं कायेगु यानाच्वंगु दु ।