ने. सं. ११४४ कछलागा षष्ठी -

बालेनयात पुलांम्ह मेयर शाक्यया सुभाय्

येँ (नेपालभाषा टाइम्स)- येँ महानगर दुनेया मू मू सतकय् मत तयेगु धकाः येँ महानगरपालिकां याःगु तयारीयात मनपाया निवर्तमान मेयर विद्यासुन्दर शाक्यं लसकुस यानादीगु दु । न्हापा थःगु हे कार्यकालय् शुरु यानागु योजना खःसां ई मगाःगु कारणं न्ह्याके मफुगुली आः मनपाया वर्तमान नेतृत्वं उगु ज्यायात न्ह्याकेगु तयारी याःगुलिं वय्कलं लसता नं प्वंकादीगु दु ।

भाजु शाक्य मेयर जुयाच्वंगु हे इलय् वि.सं. २०७७ मंसिर २५ गते तत्कालीन भौतिक पूर्वाधार तथा यातायात मन्त्री बसन्तकुमार नेम्वाङ व वय्कः थःगु हे उपस्थितिइ कामपा, नेपाल विद्युत प्राधिकरण व सडक विभाग दथुइ महानगरका मू सतकय् मत जडान यायेगु बारे त्रिपक्षीय सम्झौता जूगु खः । आः वहे ज्या न्ह्याकेगु लागिं येँ महानगरपालिकां हानं थ्वहे निगू सरकारी निकायलिसे सम्झौता याःगु दु । आः जूगु सम्झौता कथं येँया मू मू सतकय् ११ करोड ९९ लाख ७४ हजार ९२५ तका खर्च यानाः मत तयेगु ज्या जुइ । थुकी ६० प्रतिशत दां येँ मनपां व ४० प्रतिशत दां विद्युत प्राधिकरणं खर्च याइसा मत च्याकूगु वापत प्राधिकरणयात मनपां शुल्क पुला बी ।

न्हापा मेयर शाक्यया पालय् हे बजेट समेत छुटे यानाः शुरु जुइधुंकूगु ज्यायात वर्तमान मेयर बालेन साहं धाःसा थम्हं यानागु न्हूगु ज्या धकाः थःगु पक्षया सञ्चार माध्यमय् बय्बय् याकूगुलिं वय्कःया भ्वासिपहः खने दुगु खँ धाःगु दु ।

पुलांम्ह मेयर शाक्यं नं विकास निर्माणया ज्याय् सुनां जस कायेगु धकाः थज्याःगु अस्वस्थ धेंधेंबल्लाः यायेगु त्वःताः बरु सकसितं कःघाये कथंया ज्या याना वंसा जिउ धयादीगु दु । ‘नेपालभाषा टाइम्स’ लिसे खँ ल्हासें पुलांम्ह मेयर शाक्यं धयादिल, ‘महानगर व महानगरवासीया विकास व हित जुइगु ज्याय् न्ह्याम्हेस्यां न्ह्यागु ज्या याःसां नं जिगु समर्थन दया हे च्वनी । तर मेपिंसं शुरु याःगु ज्यायात नं जिं यानागु धकाः फय्गं खँ जक ल्हाना मजूसा गाः ।’