खुगूत्या अर्बया सिँ आयात

येँ – न्यनेबलय् पत्या मजुइफु । देय्या कूल भूभागया थ्यंमथ्यं ४५ प्रतिशत वन क्षेत्र लानाच्वंगु नेपालं दँय् खुगूत्या अर्बया स्वयां अप्वः सिँ व सिँया सामान आयात यानाच्वंगु दु । तर थ्व खँ सत्य खः, आर्थिक दँ २०७५÷७६य् थीथी देशय् खुगू अर्ब ६० करोड, ६१ लाख ३९ हजार तकाया सिँ व सिँया थीथी सामान आयात जूगु दु ।

भन्सार विभागया कथं वंगु आर्थिक दँय् भारत, इन्डोनेसिया, चीन, म्यान्मार, मलेसिया, सिंगापुर, जर्मनी, युक्रेन, अमेरिका, युएई लगायतया देशं थुलि बराबरया सिँग्वँ, धलिं, प्लाइ, बोर्ड, झ्याः, लुखाय् छ्यलीगु चौकोस, टेबल, साजसज्जाया सामान व मेमेगु थीथी सिं दयेकातःगु सामान आयात जूगु दु ।

थ्व आर्थिक दँय् मुक्कं आयात जूगु सिँ मध्ये ५४ प्रतिशत भारतं, १७ प्रतिशत इन्डोनेसियां, १३ प्रतिशत चीन, ७ प्रतिशत म्यान्मार व ३ प्रतिशत मलेसियां आयात जूगु दु । ल्यंदुगु मेमेगु मुलुकं आयात जूगु खः । थुकी दकलय् अप्वः प्लाइ निगू अर्बया, धलिं छगू अर्ब २७ करोडया, चौकोस व वथेंज्याःगु मेमेगु सामन ७७ करोडया, बोर्ड ५० करोडया आयात जूगु दु ।

सिँया आयात दँय्दसं अप्वया वनाच्वंगु इलय् सिँपाखें वइगु कोइला, सिँचुं, सलाई निसें टुथपिक थेंज्याःगु सिं दयेकीगु ज्वलंया आयात नं अप्वया वनाच्वंगु खँ भान्सर विभागया निर्देशक व सूचना अधिकारी शिशिर घिमिरें जानकारी बियादिल । विभागया कथं आर्थिक दँ २०७४÷७५ य् न्यागू अर्ब ७५ करोडया सिँ व सिं दयेकातःगु सामानया आयात जूगु खः ।

थ्वयां स्वदँ न्ह्यः तक आर्थिक दँ २०७१÷७२ य् मुक्कं निगू अर्ब १३ करोडया जक आयात जूगु खः । सिँया आयात अप्वयाच्वंसां नेपाःया पाखें सिँया सामान निर्यात जुइगु धाःसा तसकं म्हो जक दु । वंगु आर्थिक दँय् मुक्कं न्यागू करोड ५६ लाखया प्लाइ व काष्ठकलाया थीथी सामान भारत, चीन, अमेरिका, बेल्जियम, नेदरल्यान्ड थेंज्याःगु देशय् निर्यात जुल ।

वन तथा वातावरण मन्त्रालयया तथ्यांक कथं आर्थिक दँ २०७४÷७५ य् देय् दुने सरकारी, सामुदायिक व निजी वन क्षँेत्रय् यानाः मुक्कं छगू करोड ७५ लाख, ५२ हजार घनफिट सिँया उत्पादन जूगु दु । सिँया माग धाःसा देन्यंकं यायेबलय् दँय् स्वंगू करोड घनफिटया दु । मन्त्रालयं वैज्ञानिक व न व्यवस्थापन यानाः दँय् ६० लाख घनफिट सिँ थप उत्पादन यायेगु, निजी वनपाखें जुइगु वनप पैदावारया उत्पादनय् अभिवृद्ध यायेगु थेंज्याःगु ज्याझ्वः न्ह्याकाच्वंगु दु ।

मन्त्रालयया प्रवक्ता डा. सिन्धुप्रसाद ढुंगानां आः उत्पादन जुयाच्वंगु व लिपा थप उत्पादन जुइगु सिँ ल्वाकछ्यायेबलय् माग बराबर आपूर्ति यायेफइगु स्थितिइ थ्यंगु खँ धयादीगु दु । मन्त्रालयं सिँग्वं, धलिं लिसें थीथी सिँया सामान नं देशय् हे उत्पादन अप्वयेकेगु योजना दयेकातःगु दु ।

मन्त्रालयं थुपिं ज्याय् संरचनागत सुधारया निंतिं दि टिम्बर कर्पोरेशन अफ नेपाल व वन पैदावार समितियात स्वानाः सिँ चिरान व वितरणय् थप सहजता हयेत ‘नेपाल वन निगम’ स्थापना यायेधुंकूगु दु । अथेहे निजी वनपाखें उत्पादन जूगु सिँ फायेत, ओसारपसार यायेत व विक्री वितरणयात सहज यायेत कानुन नं सरल यायेधुंकूगु दु ।

सिँ आपूर्ति प्रक्रिया झण्झट
देय् दुने मागया तुलनाय् सिँ आपूर्ति जुइमफुगु व देय्न्यंकं सिँया उत्पादन निसें विक्री वितरण तकया प्रक्रियाय् झन्झट जुयाच्वंगुलिं सिँ आयात झन झन अप्वया वनाच्वंगु खः । थुकी छखे सिँ आयातपाखें देय्या यक्व ध्यबा विदेशय् वनाच्वंगु दुसा जंगलय् च्वंगु सिँ नं यक्व ल्याखय् ध्वगिना वनाच्वंगु दु ।

स्वदेशय् सिँ उत्पादन निसें विक्री वितरण प्रक्रियाय् यक्व झन्झट दुगु व अदृश्य रुपं यक्व ध्यबा खर्च यायेमालीगुलिं नं विदेशं सिँया आयात म्हो मजूगु खँ थ्व क्षेत्रया व्यवसायीतय्सं धाःगु दु । माग कथं सिँया आपूर्ति मजूगुलिं गुणस्तरहीन जूसां विदेशपाखें सिँ आयात यायेत बाध्य दुगु खँ नेपाल वन पैदावार उद्योगी व्यवसायी महासंघया अध्यक्ष श्यामसुन्दर ढकालं धयादिल ।

वय्कलं धयादीगु दु, ‘थुकी सरकारं नीतिगत सुधार व बिचौलियात अन्त्य मयातले आयातय् कमी जुइगु खनेमदु । बिचौलियाया रुपय् ज्या याइगु संस्था व व्यक्तिया कारणं सरकारपाखें क्वःछिनातःगु भाः स्वयां अप्वः उपभोक्तातय्सं पुले मालाच्वंगु दु ।’वय्कःया कथं विदेशं सहज व तुलनात्मक रुपं दंगु भावं आयात जुयाच्वंगु दु ।

उकिं नं विदेशी सिँ कारोवार अप्वःगु खः । सरकारी भाः कथं ग्वंगु सौसिँ (साल)या भाः प्रति घनफिट ८०० तका खः, तर व हे सिँ फाया मिइबलय् सर्वसाधारणयात प्रति घनफिटया न्याद्वः तका स्वयां अप्वः कयाच्वंगु दु । अध्यक्ष ढकालं वैज्ञानिक व्यवस्थापन पाखें वन संरक्षण व वृक्षारोपण लिसेलिसें न्ह्याकाः सिँया उत्पादन अप्वयेकेमाःगु सुझाव बियादीगु दु ।

वन तथा भूसंरक्षण विभागया कथं नेपाःया तराई व भित्री मधेसया जंगलय् निसः निसें न्यासः दँ पुलांगु सौ (साल)या सिमा दु, जबकि थ्व सिमापाखें दकलय् अप्वः उत्पादन कायेगु धयागु ८० वर्षय् खः । मन्त्रालयया लिपांगुव न सर्वेक्षण कथं वन व बुट्यान क्षेत्र यानाः नेपालय् ६६ लाख १० हजार हेक्टर वन क्षेत्र (देय्या कूल भूभागया ४४.७४ प्रतिशत) दु ।

सम्बन्धित बुखँ

LEAVE YOUR COMMENTS